PortalGuarani.com
Inicio El Portal El Paraguay Contáctos Seguinos: Facebook - PortalGuarani Twitter - PortalGuarani Twitter - PortalGuarani
PEDRO ESCURRA FRANCO

  MODESTO ROMERO CUETO - Por PEDRO ESCURRA FRANCO


MODESTO ROMERO CUETO - Por PEDRO ESCURRA FRANCO

MODESTO  ROMERO  CUETO

ÑANE  RETÃ RUVICHAITE  PYPORE

Hai poha

PEDRO ESCURRA FRANCO



MODESTO  ROMERO  CUETO (Morokue) Hi’arapáy Paraguaýpe upe 24 jasykõi 1939-pe. Oiko tavavore Tembetarýpe ko’aḡaitépeve.


Mbo’eharapavẽ ikatupyryetereíva ñande rapicha. Jahechakuaáva’erã. Avei  ohohaguérupi oheja tembiaporã, py’arorýpe imandu’a hese umi temimbo’e. Ñane mokyre’ỹ  jaguatárõ umi hapykuerérupi.


Hi’arapáyva’ekue ombo’ehaḡua ñane retã porãite ryepýpe ñaneñe’ẽ guaraní ha ñoha’ãnga.  Avañeha’ã, ha’e tembiapo osẽva ñane ãngapyruguágui. Jajapoporãrõ ñane rembiapo.


Ha’e oñemomýiva kirirĩháme. Péicha oiko avakatupyry. Umi hembiaporã ohenói umi yvypórape. Ika’avóva hembiapóre, ojapoporãitereírupi umi ava ojeporeka hembiapokuére.


Nda’ijojahái. Nda’iporivoi ha’eichagua. Jahekareíta. Ha’eño opyta omba’apo ñe’ẽ guaraní ñoha’ãngáre. Oheja chupe ha ñandereja hi’ãngirũ mbarete mbo’eharapavẽ Pedro Moliniers. Oho apyre’ỹme. Aikuaa chupekuéra ary 1970 pe.


Upérõ tukumbopúpe oiko ñaneñe’ẽ guaraní. Ha’ekuéra hekomarangatu rupivénte, guaraní rayhuhára añeteguágui ojepoi ojepovyvy oipysyrõhaḡua ñaneñe’ẽ guaraní ha umi tekombo’e rupive ohupi mbeguekatu yvatégotyo. Ko’aḡaitépe péicha oiko mbo’eharapavẽ Modesto Romero Cueto.

 

Ñoha’ãngápe oñemoarandu karaiguasu Roque Centurión Miranda, Josefina Plá ha Reinaldo Jualián Decoud Larroza ndive. 


Osẽ tenondete ohayhúrupi umi hembiapo. Pya’e oñemoarandu  avañe’ẽme  ha pe ñoha’ãnga apópe. Omyakãmyakãma umi aty’i umi iñirũnguéra apytépe. Omboguata henonderã umi ñoha’ãnga. Ñoha’ãnga jajapo atýpe, ñaikotevẽ ñande rapicháre.


Ñamba’apohaḡua atýpe ñande pireporãva’erã. Ha ñamomyiporãhaḡua aty ñaikotevẽ katupyry ha akãñamindu’u oñemomyikuaáva.   25 ary pukukue omboguata peteĩ aty ñoha’ãnga ojapóva. Paraguaýpe ha okaháre.


Mávapiko oimo’ãta ikatuha avei guaraní ñe’ẽme jajapo umi ñoha’ãnga ko arapýre ojehecharamóva. Ojehovasajoa umi oguerovikuaa’ỹva ñembotavýgui.


Peteĩ mbo’ehára naiñarandupáira’e, iñe’ẽro ku petỹicha  ñane avañe’ẽre, ndaikatúi jajapo guaraníme  umi tembiapo ñoha’ãnga ohesapéva arapýre.


Avañe’ẽ ipererĩ ha nome’ẽi. Tavýgui oñe’ẽva. Ñañáre okakuaáva. Umi ñande rapicha tarova oñemomburuvichagua’úva oisu’urasy ñane ñoha’ãngame.


Modesto Romero Cueto ohai peteĩ tapeporã ijupe ha upe tapepukukue  ha’e oñemitỹ ohóvo mbo’ehaópe guaraní ñe’ẽ ha mayma ijahápe ñane ñoha’ãnga. Ha’e tapiaite  ojepytaso karia’y  katupyrýicha,  ojapohaḡua avei ñaneñe’ẽteetépe  peteĩ  ñoha’ãnga poravopyréva ha  oguerekóva techapyrãva.


Umi ndohechakuaáiva ko’ã hembiapo ipytaguarekóguinte  térã ikatu avei  mbo’ehárachae mba’e. Ombojopóirãngue itajúpe  chupe, ojahéi hese, nome’ẽi chupe pe apyka oguapyhaḡua umi guaraní rerekua  apytépe, jepérõ ha’e ndaha’éiva joparajehe’a rerekua.


Mokõipapo ñoha’ãnga omimbíva arapýre ombahasa guaraníme, omboeirete ñemongeta ha umi avateĩñe’ẽ  techapyrãmemetéva.    


Ñambyasy ñane retãme ko’ãichagua ñaña guaraní ñe’ẽre ojejapóva. Oĩko oñotỹséva ñane ñoha’ãnga, oipytyvõrãngue.


Tuichaiterei pe Morokue rembiapo. Jahechakuaáke.   Akóinte ombo’e ñoha’ãnga ha avañe’ẽ. Ikorasõporã ñaneavañe’ẽre. Paraguaýpe ha okaháre avei ojepytaso ñane mba’eteetére. Ojapórõguare Jagua Rekove, opyta che akãme hetamba’e. Upe jaguáre ojepyvoi ha ojesu’u, ñaneñe’ẽ guaraní avei oguereko ijehe pe jagua rekove. Hetáma ojesu’u ha ojepyvoi hese. Amo yvate guive ko’a yvýpeve. Iporãmante.


Jajepoimína hembiapo rapykuerére ha jahecháta mba’emba’épa ojapo ha oheja ñandéve.


Jaikuaaháicha umi mbo’ehárapavẽ imitã guive heta oñembosako’i, heta oñeha’ã, heta hy’ái, heta ndokéi ombyatyhaḡua iñakãme umi mba’ekuaapy mba’eporã. Mba’ekuaa ndoúi ysapy apytépe ho’ahaḡua ñaneakãme.


Mbeguekatúpe oñembokatupyry. Jaikuaaháicha, ymave heta mbo’ehao ombotove guaraní ñe’ẽme. Mbo’ehao rokẽ oñembotypa guaraní ñe’ẽgui. Oñembotove ikatuháicha.


Mbo’eharakuéra oiko ombota mbo’ehao rokẽ ha Modesto Romero Cueto ha’e pe hetave ha hatãve ombotáva’ekue mbo’ehaokuéra rokẽ, iñirũ Pedro Moliniers hendive.


Ha’ekuéra oñepyrũ omyesakã maymavévape, pe ñañemoarandúrõ avañe’ẽme ikatuha ñanearanduve. Jaikuaárõ mokõi tetã ñe’ẽ ñanearanduvéta, ndahasýi mbohapyha ñe’ẽ ñaikũmbyporãhaḡua. Ñane mba’ekuaavéta. Iporã térã naiporãi, oje’e naiporãiha ñañemoarandu guaraní ñe’ẽ. Che ha’e. Ko tetã osẽhaḡua tavy iñipytũvagui oikoteve  ñañemoarandu guaraní ñe’ẽre.


Mbo’eharakuéra opaite hendápe, ojepepy ñe’ẽngatu rupive omyesakã ko’ã apañuãigua’u oñemoingéva ñande rapichakuéra akãme.


Heta ára ha’eñomi mbo’ehára Modesto oḡuahẽ umi mbo’ehao guasúpe, okaháre, mombyrymbyry, ogueraha mba’ekuaa hypy’ũva ha iporãva ñane guaraní ñe’ẽ katupyry rehegua, jahechápa umi mbo’eharakuéra noikũmbyporãvéi pe ñane avañe’ẽ. Romero Cueto rembiapo ñoha’ãnga pa’ũme. Ha’e ombo’éjave ojepurupaite.


Mbo’ehárapavẽ ikane’õ’ỹva. Akóinte ohesa’ỹiño guaraní ñe’ẽ ha omboguapy kuatiáre ha ikatúva omohenda hendaitépe ojapo mbeguekatu. Upéi opárire omoñepyrũ ipyahúva.


Oikuaaporãrupi guaraní ñe’ẽ oikotevẽha mbo’ehára katupyrýre, mayma pytagua ñe’ẽicha. Ha’e katuete ipireporã, jepérõ hetamba’e ijetu’u hendive. Oguenohẽ ijehe umi kyre’ỹ oikotevẽva. Hekove ha’e techapyrã umi mitãrusúpe ḡuarã. 


Heta apañuãi apytégui oñemotenonde ha oipykúi pe tapeporãite ñane retã ñe’ẽ rayhupápe. Hi’ãnte ahecha heta ha’eichagua. Jajerurénte Yvateguápe.


Tekotevẽ jahechakuaave umi hembiapo. Ñoha’ãnga ja’évo, hetamba’e ja’e ha ijapytépe ja’e Morokue ha’ehína peteĩ mbo’ehao, henyhẽva mba’ekuaágui. Hembiapokuéra ojapo peteĩ mbo’ehao pyahu. Sa’ieterei  oĩhína umi ikatúva ñambojoja hese. Guaraní ñoha’ãnga ja’évo ha’eñoitehína.


Naiporãi ogue ñane ñoha’ãnga guaraní. Tekotevẽ ñaipytyvõ chupe, jahayhúrõ ñane mba’eteete ha ñane retã. Romero Cueto ha’e pe karaiguasu tuichavéva ñande apytépe ha ikatupyryvéva guaraní ñe’ẽ  rerekuateete.


Ndaipóri jejavy umi hembiapokuére. Umi joparajehe’a  rayhuhára ombotove tapiaite pe Pedro Molinier ha Modesto Romero Cueto rembiapo avañe’ẽme. Avei oñemohemby pe jaikuaahápe. Ñembotavy tavýre, kachiãime  ñanera’ãvai.


Modesto Romero Cueto, ohohápe ojapóvo tembiapoporã, oheja mandu’a iporãva, techapyrã hekove. Ñañeporandukuaa mba’ére umi ava ojavy pe tapeporã ha oike apañuãi rapére ha tuicha kyre’ỹre. Naimo’ãséi umi aimo’ãva. Tove.


Mba’ére ñamomba’eguasu mbo’ehára Modesto Romero Cueto-pe, mba’ére. Ha’e umi tembiapoporã apohánte. Añeteháme. Opámba’e ojapo hendapete. Upéicharõ ja’ekuaa. Naiporãi pe ñañemoarandurire ñase tavy rembiapóre jajekuauka. Tekochae ñeha’ã naiporãmbái.


Ñama’ẽmína umi hembiapokuére. Ko’ã ñoha’ãnga ombohasa guaraní ñe’ẽme mbo’ehárapavẽ Modesto Romero Cueto ha oipytyvõ chupe iñangirũ mbo’eharapavẽ Pedro Moliniers.


1. Ary 1973. Jagua rekove. Rogelio Silvero Mba’e.


2. Ary 1973. Pe pojopy. Moliere (Juan Bautista Poquelin) mba’e.


3. Ary 1974. Jurumy’ỹi. Gabriel Casaccia.


4. Ary 1975. Tetãgua resay. Anibal Benitez Navarro mba’e.


5. Ary 1976. Paje. Ovidio Benitez Pereira mba’e.


6. Ary 1976. Pombero ra’y. Anibal Benitez Navarro mba’e.


7. Ary 1977. Aña ha Mborayhu. Anibal Benitez N ha Modesto Romero C. mba’e


8. Ary. 1978. Ykua rape, jepe’ava ha jakare. Antonio Amarilla- Romero Cueto


9. Ary 1979. Yerma. Federico Garcia Lorca. Mba’e.


10. Ary 1980. Pukarãite. Modesto Romero Cueto. Mba’e.


11. Ary. 1983. Ñorairõ rapykuere. Rogelio Silvero. Mba’e.


12. Ary 1986. Aña rymba. Carl Choenherr. Mba’e.


13. Ary 1988. Jagua  rekove. Rogelio Silvero mba’e.


14. Ary 1989. Ñande yvy./ Karu pokã. Julio Correa.


TAVAO ÑOHA’ÃNGAO: Táva Paraguay mba’e. Ha’e pe iporãvéva ha ikatevéva. Upépente oñemba’aposéva ha ojehechase avei. Nde rejupirirõ upépe remba’apo, nde ndaha’éi mba’eve guasu. Pévare heta jesu’u oiko, yvýguio ha yvatég io. Tavao ñoha’ãngaópe nomba’apóijave Molinier-Romero Cueto, ogueraha ñoha’ãnga ñaneñe’ẽme umi okaháre ha heta távape oguahẽ ohechukaporã hembiapokuéra. 


Hetaiterei  pakovapire oñemoĩ  umi ñoha’ãnga ojapoporãsévape. Katuete ojejuhu pa’ã opaichaguareíva. Heta ary ñoha’ãnga ojapóva Molinier-Romero Cueto, nda’ijái pe Tavao Ñoha’ãngao. Oiko umi jesu’u ha ñemyaña ensuguy.


Ñane retã isãso upe 2 jasykõi 1989-pe. Ñane ñoha’ãnga oñepyrũ oñeñapytĩ, oĩkuri pe opyrũ pohýiva ko’ã tembiapo porãre. Opámba’e osẽvaipa. Chéve ḡuarã ko’áḡa ñane ñoha’ãnga isãsojeýma. Néike lomitã ja’ekuaa. Ñaipytyvõke Modesto Romero Cueto-pe. !!!


 


 

ENLACE INTERNO A ESPACIO DE VISITA RECOMENDADA

MODESTO ROMERO CUETO en PORTALGUARANI.COM

(Hacer click sobre la imagen)

 


 


 

 

 

ENLACE INTERNO A ESPACIO DE VISITA RECOMENDADA


(Hacer click sobre la imagen)






Bibliotecas Virtuales donde se incluyó el Documento:
IDIOMA
IDIOMA GUARANÍ - POESÍAS - MÚSICAS - ESTUDIOS
LIBROS,
LIBROS, ENSAYOS y ANTOLOGÍAS DE LITERATURA PA
REPÚBLICA
REPÚBLICA DEL PARAGUAY...



Leyenda:
Solo en exposición en museos y galerías
Solo en exposición en la web
Colección privada o del Artista
Catalogado en artes visuales o exposiciones realizadas
Venta directa
Obra Robada




Buscador PortalGuarani.com de Artistas y Autores Paraguayos

 

 

Portal Guarani © 2024
Todos los derechos reservados, Asunción - Paraguay
CEO Eduardo Pratt, Desarollador Ing. Gustavo Lezcano, Contenidos Lic.Rosanna López Vera

Logros y Reconocimientos del Portal
- Declarado de Interés Cultural Nacional
- Declarado de Interés Cultural Municipal
- Doble Ganador del WSA