PortalGuarani.com
Inicio Nosotros Indice de Artes Visuales Indice de Literatura, Música y Ciencias TV Online Paraguay
Powered by
Idioma:
Seguinos:
Colores de fondo:
PEDRO ESCURRA FRANCO


  SILVIO PETTIROSSI - Ñe’ẽhaihára PEDRO ESCURRA FRANCO


SILVIO PETTIROSSI - Ñe’ẽhaihára  PEDRO ESCURRA FRANCO

SILVIO PETTIROSSI

ÑANE  RETà RUVICHAITE  PYPORE

Mbohapypapoapy

Ñe’ẽhaihára  PEDRO ESCURRA FRANCO


Silvio Pettirossi Pereira, hi’arapáy  Paraguaýpe, 16 jasypoteĩ ary 1887, hape hi’arake táva Buenos Aires-pe, La Plata oje’ehápe, tetã  Argentina ryepýpe, upe 17 jasypa ary 1916, pyhareve asaje. Oguerekójave 29 ary. Imitãre ñandereja. Itúva Antímo Pettirossi  hape isy Rufina Pereira Roldán.

Mba’yruvevehára, ikatupyryrasapa ha ipy’aguasúva’ekue  ojupihaḡua oveve  yvate ha ojapo umi guyra tarova rembiapo amo yvatete.  Mba’yruveve ombojere ha omoĩ  ovakão, upéi ojere ijehe ha ojapo papapy poapy pe ijevevépe, avei ojepoi  ku guyra tavýicha ojekutuhaḡuáicha yvýre, ñaimo’ãnte ombokapuséva yvýre pe imba’yruveve.  Upérõ umi mba’yruveve  ndaha’eiete  ko’aḡaguáicha, ỹmave okororõ’i  ha hete kangy.

Ỹmaite  guive yvypóra oveveséva ha ndaikatúiva. Heta ava oñeha’ã ko yvyapére.  Opu’ãséva umi guyráicha arapýre oikohaḡua.  Yvypóra opoñy, oguata, oñani, opopo hape ndovevekuaái.  Yvypóra ovevesetereíva, hovayváva  yvágare  hape nda’ipepói opu’ãhaḡua umi guyráicha. Areterei oma’ẽasy  umi guyráre, oikóva oguata yvýre, yvyrarakãre ha oveve  amo araíre. 

Ndajaguerekóiva pepo ha avei jaguerekoséva.  Upe tekosã’ỹ omba’apo ñanderehe. Tova’atãme javeveseterei. Guyra purahéi pya’e ombopurahéi yvypórape.  Umi guyra veve omoinge yvypóra akãme peteĩ mba’epotave. Tekotevẽ ndoguerekóiva  yvypóra.

Heta ary iñakãñamindu’urire umi yvypóra, ojeporeka jahechápa ikatu ojapo pe mba’yruveve  oikotevẽva. Upérõ ojeguereko mba’yru  osyryrýva yvýre ha ýre. Oĩ umi mymba oguatáva ñandereheve.  Heta tetãme oiko ñeha’ã ojejapohaḡua umi mba’yruveve.  Ojehechakuaa umi guyra ipya’eveha umi yvypóragui, amo  yvate ovevéjave.  Yvyporakuéra oike tuicha akãrakúpe, ovevesetereíma.

Yvypóra ojereséma ko yvyapére ovevehápe.  Oipapa aravo tetia’épe mbovy aravópe  ikatuha ojerepaite  yvy’apu’áre. 

Mba’e oguereko umi guyra pepo ajeve ovevekuaa  ha’ekuéra.  Hape ñahatĩkatu  mba’éicha oveve ha opytanunga pe ovevehápe.  Péicha javevéne he’ijoa umi  yvypóra Europa-guáva. Ojupi ypy guive amo yvate umi mba’yruveve oñepyrũ oha’ãnga  opaichagua  guyrápe. Ojapohikuái techapyrã.

Umi  mba’yruveve oĩporãmba mboyve  oñembosarakipaite amo  yvate. Heta oñemano upéicharupi. Oveveporã mboyve mba’yruveve, ka’ícha amo  yvate  ojapo opaichagua ñemomýi, ojepoi ovakãvo ha upéi ojerejey  yvatégotyo ha yvýgotyo.  Avei ohohápe péicha iñakãhatã mba’yruveve ha ojechuka ikatuha ojapo umi jetyvyro  araíre.

Mba’yruveve mbovevehára hetave oĩkuri Europa ryepýpe ha sa’i oĩkuri ko yvóra pyahúpe. Argentina oguereko Jorge Newbery, tetã Brasil oguereko Alberto Santos Dumont ha tetã Paraguay oguereko avakatupyry Silvio Pettirossi. Ñane retãme  nda’ipóri mba’eve. Ndajaguerekói nipe ñamyatyrõhaḡua mba’yruveve. Ponandi.

Oikeriremi mbo’eharógape táva paraguaýpe oñemombe’u chupe pe ha’e ohekáva. Heta ára yvyrarakãgui oveve ambue yvyrarakãre, ku ka’ícha. Marandurupi Pettirossi oikuaa oĩha umi mba’yruveve ha pya’emi osẽ oho Italia ha Francia ryepýre ojeporeka hese. Opyta Italia-pe oñemoarandu, jepérõ isy ha itúva ndoguerohorýi upe ojaposéva.  Heta kyhyje omoheñói yvypóra korasõme, umi mba’yruveve ojejapo ypyhaḡua.

 Upépe ohecha mba’éichapa oñemba’apo  oñemopu’ãvehaḡua mba’yruveve. Ohecha ypy guive  mba’yruveve iñakãraku hese.  Heta  mba’épe oñemoarandurire ojevy hetã Paraguaýpe. Heta iñakãhatãrire táva Paraguaýre umi iñirũndi oho Buenos Aires-pe ojeheka.

Ojeporeka karai jorge Newbery rehe upe tavaguasúpe, ha’éva upérõ pe ikatupyryvéva, mba’yruveve mbovevehára. Oikuaaporãhaḡua oñemoarandu pe mba’yruveve retére.  Upéite Jorge Newbery ohechakuaa Pettirossi oĩmaha omoñepyrũhaḡua pe mba’yruveve ñemboveve.  Upe jeveve ypy osẽporãiterei chupe.

Newbery omokyre’ỹ Pettirossi-pe ohohaḡua tetã Francia-peve. Upépe oĩva’ekue umi ikatupyryvéva  mba’yruvevépe. Mba’yruveve mbo’eharógape oguahẽ ha oñemoĩ katupyryhaḡuáicha. Ohupytýkuri ñepytyvõ  umi mburuvicha  ha mbo’ehára iñaranduvévagui. Ohechakuaa ñane retã oikotevẽha mba’yruveve.

Umi  hogaygua ombotove pe ijeho tetã ambuére, oĩgui umi kyhyje  osẽva ñande py’áre. Hetaiterei omanórupi mba’yruveve mbovevehára.  Heta ho’a yvatégui okapu  yvýre. Upéinte oñemoneĩ chupe upe ijeho. Pe jasyporundy pahápe osẽ oho Buenos Aires-pe. Upégui osẽjey ygarápe ypara rupive oho Francia rapére upe 4 jasypa  ary 1912-jave.

Francia ryepépe, táva Champage Reims, oĩva’ekue mba’yruveve mbo’eharóga ha’e oñemoaranduhague, umi Francia-guáva apytépe ha’e osẽjey tenondete, peteĩháme. Oñeme’ẽ chupe kuatiakatu he’íva ipype ha’e ikatupuryha mba’yruveve ñembovevépe.

Poapy aravo oveve upe mbo’eharóga jerére, ojapóvo papapy poapy ra’ãnga. Ojehero chupe upévare, yvytu mburuvichapavẽ. Oñeme’ẽve  chupe jopói  ha’érupi pe arevéva oveve ovakãvo pe arai apytépe. Upérõ Francia-pe ojehupi ñande poyvi pytã morotĩ hovy, oñemboveve  yvytúre  hérape.  

Francia-gui oujey tavaguasu Buenos Aires-pe, ary 1914 jasyapýpe, upe Buenos Aires ryepýpe heta jopói oipo’o ha umi jehecharamo ha jererohory, omboaguaráva’ekue chupe.

 Upéi osẽ oho Rio de Janeiro ojapohaḡua ha ohechukahaḡua mba’yru ñemboveve. Avei ohasa Uruguay-pe ha Santiago de Chile-pe, ohechukahaḡua imba’ekuaa pe mba’yruvevére, ojupívo amo araíre yvagaguýre.

Itúva ha mayma ohecháva chupe he’íva. Silvio Pettirossi ndaha’éi guyra ha oveveporavẽ umi guyrágui. Jareko peteĩ ára ikatúva jahai itajúpe. Upe 17 jasypateĩ  ary 1914, ha’ehína pe ára jaguerekóva’erã mandu’apoty apytépe.  Upe árape Silvio Pettirossi ojupi ypy ovevehaḡua mba’yruvevépe ñane retãme ohechuka imba’ekuaa.

Silvio Pettirossi, omenda kuñataĩ Uruguaypeguávare, hérava’ekue Sara Usher Conde. Pe ñemenda oiko 28 jasypakõi ary 1914-jave.

Upérire oguahẽ popirũ ohohaḡua tetã EEUU, ohechukahaḡua ikatupyry umi mba’yruveve ñembovevépe.  Upépe ohechuka hetaiterei umi mba’ekuaa yvate mba’yruvevépe.  Jepopete ayvúpe ojeguereko chupe upérupi.

Ñanemandu’áne avei pe ikatupyryhaguére mba’yruvevépe.  Heta ára avei ojeityse chupe tesaráipe. Upe imba’yruveve  retére  ojepokovaíneraka’e  ho’ahaḡuáicha yvatégui. Ndojekuaái moõpa ojepokóraka’e upe imba’yruvevére. Ỹmave  oĩva’ekue umi mba’e. 

Yvytúre oñani amo yvate ha upéi ha’ete ku opoíva ijehegui hape mba’yruveve  rete  ojerejere ha oñeme’ẽ  yvytúpe oguerahahaḡua chupe. Mayma tetã ohohápe oñekuare’ẽ chupe omyakãhaḡua  mbo’eharóga mba’yruveve rehegua. Ha’e  ome’ẽ aguyje ha he’íva chupekuéra. Che retã Paraguáypente che aipota mbo’eharóga.

Táva La Plata, Buenos Aires akã, tetã Argentina, upe 17 jasypa ary 1916-jave, pyhareve asaje ovevéjave mba’yruveve oñembyai amo  yvate ha  ho’a  yvýpe, omano upe imba’yruvevépe.

Oñeñotỹ ñembyasy apytépe ñane retãme, ñande táva Paraguaýpe pe yvyty Recoleta ryepýpe, upe ára 24 jasypa ary 1916-jave. Iñeñotỹháme ijaty popasu  yvypóra.

 Tetãygua ikatupyryha ohechuka Europa ha América ryepýpe karaiguasu aranduete Silvio Pettirossi. Upérupi heta omboveve ñane retã Paraguay poyvi.  

@19 jasypoapy ary 2015@

 

ENLACE INTERNO A ESPACIO DE VISITA RECOMENDADA

SILVIO PETTIROSSI en PORTALGUARANI

(Hacer click sobre la imagen)

 


 

 

ENLACE INTERNO A ESPACIO DE VISITA RECOMENDADA


(Hacer click sobre la imagen)


 




Bibliotecas Virtuales donde fue incluido el Documento:
IDIOMA
IDIOMA GUARANÍ - POESÍAS - MÚSICAS - ESTUDIOS - ENSAYOS - DICCIONARIOS
HISTORIA
HISTORIA DEL PARAGUAY (LIBROS, COMPILACIONES, ENSAYOS)
REPÚBLICA
REPÚBLICA DEL PARAGUAY (GOBIERNO Y GEOGRAFÍA)

Compartir FB

 

Leyenda:
Solo en exposición en museos y galerías
Solo en exposición en la web
Colección privada o del Artista
Catalogado en libros en artes visuales o exposiciones realizadas
Venta directa
Obra Robada

Ver Perfil y otras Obras del Autor...


Sol de Oro S.A. - www.soldeorosa.com

Buscador PortalGuarani.com de Artistas y Autores Paraguayos
 
MISIONES JESUÍTICAS EN PARAGUAYFILATELIA DEL PARAGUAYMUSEO VIRTUAL DE LA MUSICA PARAGUAYAIDIOMA GUARANIMUSEO DEL HUMOR PARAGUAYOLITERATURA PARAGUAYAMONEDAS DEL PARAGUAY 1790 - 2011CASA DEL LA INDEPENDENCIA
REPUBLICA DEL PARAGUAYLA GUERRA DEL CHACOHISTORIA DEL PARAGUAYMÚSICA PARAGUAYAMITOS Y LEYENDAS DEL PARAGUAYBILLETES DEL PARAGUAYBIBLIOTECA DEL PORTALGUARANIACADEMIA PARAGUAYA DE LA HISTORIA

Portal Guarani © 2015
Oficina: Asunción Super Centro - Gral. Diaz entre 14 de Mayo y 15 de Agosto - Local 372, 2do. Piso
TeleFax.: 451-486 - Contacto: info@portalguarani.com
PortalGuarani.com en fuente oficial de informaciones e imágenes del Paraguay para Wikipedia.org
Asunción - Paraguay - Proyecto Desarollado por Apunto

Algunos Logros y Reconocimientos
- Portal Guarani, Es declarado de Interés Cultural Nacional
- Portal Guarani, Es declarado de Interés Cultural Municipal
- Portal Guarani, Doble Ganador del WSA