PARAGUAÎ YVOTY TECHAGA’ÙGUI OMANO!
.
PARAGUAÎ YVOTY TECHAGA’ÙGUI OMANO!
Ko árape, che irû nguera,
Péina ñaromandu’a,
Kuimba’e hyapúva héra
Ha ombopotyva tetã.
Mbo’ehara iñarandúva,
Omimbi hapykuere...
Ñande yvy omokunu’ùva
Ku ára ha pyhare.
Tetâ poyvi ikorasôme,
Pytâ, morôtï, hovy,
Oikómi yvate ipópe
Ñane retâ pumbasy.
De táva rayhupápe
Mba’apo nomomba’ei,
Eíra ijahy’okuápe
Hesehápe opurahei.
Hembiapo "Guarania" hera,
Ñande yvy poty rykue,
Ñande reko omoañetéva
Ha yvate ogueroveve.
Kuimba’e porayhujára,
Op ára ha’eve!
Ha opa tavaygua ohecháva
Ijykére katuete...
Che mandu’a peteï ára
Oityrô guare iñe’ê,
Mitàrusu ojejukava
Oguero’ÿrô ha’e.
Tekosa’ÿ omongy’áva
Tuichami ohovapete,
Hemiandu ombojeroviáva
Jepevente oñeinosê!
Mombyry ñane retâgui,
Hekópe kuimba’ete,
Toime oimehape oimehágui
Imandu’áva hese.
Nda’ei hesay hováre
Upérupimi oiko hague,
Jepe ikorasô ruguare
Oime ñembyasy oikove.
Opa hendápe oguâhêva
Ñerâve’ÿ ombopoty
Ha chupe oñemomba’éva
Ohayhúre ñande yvy.
Upei, ñaimo’â hasyva,
Oma’êmi mombyry...
¡Mba’epo chugui okañyva!
Hese rojepy’apy.
Oime hasyha he’íva
Ikorasôgui ndaje...
Têra ku ikangue ombo’íva
Nomongue véiva ichupe.
Piru, juku’a sosópe
Ápe, amóme otavahu...
Ha oiméma he’íva: ¡Aipópe!
Upeva chichâ guasu.
Ha upeicha oguâhê pe ara
Jahecháma ojepyso...
Mba’epo chupe ojukáva,
Ndikatúiva ojejoko.
Cheko aikuaá, che irû nguera,
Ha’épa mba’égui oho...
Namba’asyi pe Omboguéva
¡Techaga’úgui omano!
Félix de Guarania,
Agosto de 1999.
.
Director editorial: Pablo León Burian
Editorial El Lector, Asunción – Paraguay, 2004 (206 páginas)
ENLACE INTERNO A ESPACIO DE VISITA RECOMENDADA
EL IDIOMA GUARANÍ, BIBLIOTECA VIRTUAL en PORTALGUARANI.COM
(Hacer click sobre la imagen)
