PortalGuarani.com
Inicio El Portal El Paraguay Contáctos Seguinos: Facebook - PortalGuarani Twitter - PortalGuarani Twitter - PortalGuarani
DARIO GÓMEZ SERRATO (+)

  ÑASAINDY JAVE , JASYJATERE y YVOTY REKA (Poesías de DARIO GÓMEZ SERRATO)


ÑASAINDY JAVE , JASYJATERE y YVOTY REKA (Poesías de DARIO GÓMEZ SERRATO)
ÑASAINDY JAVE , JASYJATERE y
YVOTY REKA (MARISCAL LÓPEZ RÉRAPE)
POESÍAS de DARIO GÓMEZ SERRATO
(Enlace con datos biográficos y obras
en la GALERÍA DE LETRAS del

**/**

ÑASAINDY JAVE

(José A. Flores opurahéiva’erã mbarakápe)

Jasy morotĩ remaña mombyrýva cherehe rehóvo,
py’a tarovágui márõ nderekévai cheichaite avei
ha chéicha remoñáva araka’eve jahupyty’ỹva,
ndéko che reindy, jasy morotĩ maña asymi.

. Ejehykuavóna ko kuñataĩ rogaguy porãme,
. jasy morotĩ, ehesapemi ko che rendaguã;
. añesữpehẽta ko hovetã guýpe, ha aropurahéita,
. mba’asy po’ícha che pytéva ohóvo ko mba’epota.

Rekéva reína kuñataĩmi ahayhu porãva
epu’ã ehecha ne rokẽme oúva, oñepomoĩ
tupãmba'ejára, nerenói haguéma hembe ruguypáva
ha nderechaségui yvága ru’ãre hesakãrei.

. Ka'aguy poty chemo akãnundúva nde pukavymíme
. ha ne ryakuãngue rapykuéri aikóvanga atyryry.
. Eju cherendápe he'ukámo chéve nde jurúgui eíra,
. tosopa anga ko che py’a yuhei, ka’aguy poty.

Esẽ cherendápe ha nde apysaitépe tamombe’u ndéve
mba’éicha rupípa ko che mitãhápe aiko añembyasy
che páy ha che kéra urutau rasẽicha che py’a jopýva
ha yvytu pirúicha che ruguy apére oikóva opoñy.

. Jasy morotĩ remaña mombyrýva che rehe rehóvo,
. nderekéi haguéma nderesa'yjúva cheichaite avei;
. ko’ẽramoiténte rehasa hasa ha reiko reikóvo,
. chetavy haguéma reikuaáva'erã, jasy morotĩ.

**/**

JASYJATERE

Jasyjatere kañyhápe oikóva ka’aguy mbytére
ohyvi yvytu ha oipovã vy'a ymave guare,
ikeraguata ko ko’ẽsorópe ha ogueru ijapére
ka'avo ryakuã, ysapy poty ha guyra ñe'ẽ.

Poriahu asy itindy rei opívo ojehechágui
ipógui osaingo yvyra piru paje rerekua,
yvytu ko’ẽ ojykýi jykýiva ysapy iñakãgui
ipysami ári ojapajeréivo omimbi joa.

Peheja toiko taikeraguata anga torypápe
ani py’aro ha ñe’ẽmeguãme ñaikusãjopi,
ikatu vaerã ku oime ogueru hi yvyra kuápe
vy’a’ỹ, omboguéva ha poyhu ojoráva, pohã ka’aguy.

Tove toguãhẽ ku hógape guáicha pukavy apytépe
ha tohekuavo ipo mokoivépe guyra purahéi,
péina ave ogueru hi’aju vaekue ka’aguy mbytépe
hi eirapáva yva omongueráva py’aro ha yuhéi.

**/**

YVOTY REKA (MARISCAL LÓPEZ RÉRAPE)

Ko´ẽmbota oguahẽma, che tupãsy epu´ãke
jaha umi ñu mbytére yvoty jaheka;
ko nde róga rokára taipotĩ verapáke,
Mariscal López ára jarohory haĝuã.

. Nde sái ku iporãvéva, hovýva ha pytãva,
. ku pacholí meméva emonde ndejehe;
. ha pe nde ati´y ári ehekuavo nde áva
. kuarahy ágã osẽvo tojaitypo pype.

Vevehápe jaháta ñande képerõ guáicha,
ñande rakykuerépe purahéi tahoky,
ha amoite ára ru´ãme ñaguahẽta guyráicha,
Mariscalpe guarãva yvoty jarovy…

. Ñandejára oipotágui ñandéve ohendukáva
. Mariscal López réra ndopavéime haĝua
. oguahẽne oguahẽva, ohasáne ohasáva
. opaite yvy ape ári ohesapéva´erã…

Ahechávaicha aína amo Cerro Korápe,
henda morotĩ ári kuarahýicha omimbi;
ikorasõ ipópe ko hetã rayhupápe,
arasunu apytépe ¡huguýpe oñapymi…!

. Ko´ẽmbota oguahẽma, che tupãsy epu´ãke
. yvoty iporãvéva jaheka oñondive;
. ha nde róga rokára tahendy verapáke,
. Mariscal López réra ñesuhápe ja´e.

**/**

OPINIONES SOBRE EL AUTOR

 “Podríamos decir, sin temor a equívoco, que Darío Gómez Serrato es la cumbre de la literatura guaraní. Los estudiosos de nuestra lengua nativa lo ubican en el privilegiado sitial de clásico de nuestra poesía. En verdad este notable bardo paraguayo, vino al mundo para llenar de trinos y armonías el parnaso guaraní. Darío Gómez Serrato, como Manuel Ortiz Guerrero o Narciso R. Colmán, es un taumaturgo de la poesía vernacular y primigenia”, afirman PEDRO ENCINA RAMOS y TATAJYVA en el libro LAS CÍEN MEJORES POESÍAS EN GUARANÍ (Segunda Edición, 1997), y señalan igualmente que en su lecho de dolor, Emiliano R. Fernández decía: "Darío Gómez Serrato es maestro de maestros. Él está por encima de todos nosotros".
**/**

Fuente: 25 NOMBRES CAPITALES DE LA LITERATURA PARAGUAYA. Compilación y selección: SUSY DELGADO. Editorial Servilibro, Asunción-Paraguay, 2005 (389 páginas).





Leyenda:
Solo en exposición en museos y galerías
Solo en exposición en la web
Colección privada o del Artista
Catalogado en artes visuales o exposiciones realizadas
Venta directa
Obra Robada




Buscador PortalGuarani.com de Artistas y Autores Paraguayos

 

 

Portal Guarani © 2024
Todos los derechos reservados, Asunción - Paraguay
CEO Eduardo Pratt, Desarollador Ing. Gustavo Lezcano, Contenidos Lic.Rosanna López Vera

Logros y Reconocimientos del Portal
- Declarado de Interés Cultural Nacional
- Declarado de Interés Cultural Municipal
- Doble Ganador del WSA