El contenido de esta página requiere una versión más reciente de Adobe Flash Player.

Obtener Adobe Flash Player

Inicio Nosotros TV Online Paraguay Contactos Idioma:
Galería de Artes Visuales
(Lista de Autores en Orden Alfabético)
  Galería de Literatura y Ciencias
(Lista de Autores en Orden Alfabético)
Powered by
Seguinos:
IDA TALAVERA DE FRACCHIA

  HERUGUA POTY - Poesías en Guaraní de IDA TALAVERA


HERUGUA POTY - Poesías en Guaraní de IDA TALAVERA

HERUGUA POTY

Poesías en Guaraní de IDA TALAVERA

 

ÑANDE HAIHÁRA GUASU AVAÑ’ẼME

GRANDES AUTORES DE LA LITERATURA EN GUARANÍ

 

HERUGUA POTY

© IDA TALAVERA

© EL LECTOR

Director Editorial: Pablo León Burián

Coordinador Editorial: maurolugo

Diseño Gráfico: Denis Condoretty.

Hecho el depósito que marcha la Ley 1328/98

I.S.B.N. 978-99953-1-202-2

El Lector I: 25 de Mayo y Antequera. Tel. 491 966

El Lector II: San Martín c/ Austria. Tel. 610 639 - 614 258/9

www.ellector.com.py

Esta edición consta de 2.000 ejemplares.

 

 

MAITEIMÍMANTE

 

Paraguái ñe'ẽporãhaipyre ningo jaikuaaháicha ha'e gueteri peteĩ kapuéra pyahu porã oikotevẽva tapicha arandu oñemitỹsévare ipype, hetamíko oĩhína umichagua -isarambipánteko-, umi máva ha'ehína ymaite guivéma ohyvykóiva ñe'ẽporã yvy ha ohapyaty katuíva hemiandu ra’ỹi heñói va’ekue tape kú’áre, umi kuña ha’e... kuimba'e paraguái niko oipyaha mbeguekatu oúvo ñane retã ñe'ẽporã guarani ñe' ẽme.

 Ñane avañé’ẽ hetaitéma ho'a ha opu'ã rire, oguerujey sapy’a ipytu ha oñemoĩ ogueraha ipyti’áre karaguataty vai opororopava’ekue haperãme, EL LECTOR ndohechagíri ñane retá ha ñane ñe'ẽporãhaipyre remikotevẽ osapukáiva ojerurévo oñemono'õmbami ha oñemoherakuã haĝua, upéicharõmantepy avei avañe’ẽ poty oguatáta tape pyahu potĩ asy ymaitéma oikotevéva rehe, jahechápa hetesoro ha ipotyjera ko'ẽreíre.

 

 

MANDU’A

 

(Ida talavera-pe)

 

Mandu’a

ojehýi.

 

Pyhare

omanova'ekue

nde resápe,

che resápe

omimbi.

 

Mombyry.

 

Mombyry

che ñé'ã

oveve.


Mandu'a

rata

sununu

cherapy.

 

 

Tuicha.

Tuichave

mandu’a.

F. Acosta

 

 

ANI REJEPYAPY

 

Ikatuga'u ra'é

nde ruguýpe añapymi,

ha upépe añemonge

ha ne ñé'ãme amimbi.

 

Térã taveve yvatévo

mbyjú’ícha pyhare

ha aĝuahẽ pe reimehápe,

nde py'áre aperere...

 

Tove terejahe'o

ne anga'u javeve

ha ere oho mombyry'asyete

kuña che rayhuva'ekue.

 

Ani rejepy'apy,

ndéve ĝuarãmínteko che,

che ñe'ãmeko opupu

ndéve ĝuarã mborayhu.

 

 

AIKOVE AJA


Aikove ajákena

cherayhu,

chembojerovia,

chemokunu'ũ

anítei amano rire

cherechaga'u;

ha che naimevéi,

romotyre'ỹ.


Aikove ajákena

cherayhu,

ani amano rire

neremokãvéi

pe nde resay;

ha che aveve

aha mombyry,

roheja neaño,

romotyre'ỹ.

 

 

VY’A’Ỹ


Che tapỹimi ha’eño

"naranja"-týpe okañy,

kapi'ipére añeno

jasýre ama'ẽ haĝua.

 

Ne'ĩrãitérõ ĝuarã

yvytu kangy asy

ohasakúevo ogueru

mbarakasã jahe'o;

ha che py'aitégui aipo'o

purahéi ndéve ĝuarã.

 

Araká'épa ñande

ñaime jeýne ojoykére

roñomíne kotypýpe

anive haĝua reho.

Chereja guive che'año

ndavy'ái, ajahe'o.

 

 

NDENTEVOI

 

Hi'ãva chéve ajykýi

ñé'ẽ poravo pyre

ha oĝuahẽvo pyhare

jasy rendy ahekýi.

 

 

Ajapómo ndéve ĝuarã

peteĩ tupa morotĩ

arasýpemo roñuã

reverapaite haĝua.

 

Hi'ãva chéve aipyaha

ñe'ẽ poravo pyre.

Yvytu ramo taiko

rogueroveve haĝua.

 

Ha yvágape aroĝuahẽ

nde yvoty ryakuãnguemi,

ndéntevoi ko yvy ári

chéve ĝuarã remimbi.

 

 

CHÉKO YVYTU


Sapy'aitérõ ĝuarã

aguéta nde rekovégui

aníketi chereka.

 

Tata pariri hovýicha

avevéta ndehegui

ha ã che pepomimi

mombyryete okañýne

arai guýre ndehegui.

 

Ndachekuaáinteko nde

ha upévare reimo'á

cherupyténe haĝua

nde pepo kusuguemi.

 

Che yvytu, arai,

ha ambogue angaipa

anive chemyangekói;

ni che rape reheka.


 

NDÉVE ĜUARÁ


NDe rérape amosusũ

che mandyju inimbo

ha aipyaha porã asyete,

ñe'ẽ poravopyre,

ha opa rupi amosarambi

ipepo mimbi asy

ikatúne oĝuahẽ

nde ypýpe che panambi

ogueraháva ijurúpe

che yvoty morotĩmi.

 

 

LAMPÍŨ MBOPI


Peteĩ lampíũ mbopi

nomboguéiva ni yvytu,

upéichako che avei

rohayhúgui cherendy;


Amimbi, cherendypu,

chejuky ha cheporá,

ha ndaipóri kuimba'e

ndehegui chepe'avarã.

 

Ndaipóri ko yvy ári

ijukýva ndeichagua

ha oñé'ẽva guyraũicha

he'iséva he'i haĝua.

 

Upéichanteko avei

rekĩrĩrĩró jepe

umi nde resa yvoty

kĩrĩrĩhápe oñé'ẽ.


 

NE PONCHO GUÝPE


­Aiméma ne póncho guýpe

nemba'erãntema che,

ha tove toikuaase,

mba’éichapa nderéra,

toporandu yvytúpe,

térã toho ka’aguýpe

toheka nde pypore,

namombe’uichéne che

pono chembotapere

ne mborayhu põrãite.

Ne póncho guýpe aime,

nemba'erãntema che.

 

 

CHEJOJAITA NDE REHE


Chejojáita nde rehe

nderovatavy haguére

aníkena rohunga

guaraníme kuimba’e.

 

Ñemihápe ñeko'õi

okambúva nde rehe,

ha nde ruguýpe heñói

yuhéi asy che rehe...

 

Guyráicha rejevykói

ha opárupima remaña,

maymárõ akã hy'akua

neañomi rekay'u haĝua.

 

Nde katupyry che pa’i,

chejojáita nde rehe,

chéve ĝuarã nde ka'i...

ha ndaikatúi reveve.

 


 

ÑANDEJÁRAPE HA’E
 

NDe reme'ẽva'ekue chéve

ko mborayhu morotĩ,

aníkena chereja

ko yvy ári che añomi.

 

CHupénteko che ahayhu

upéva nde reikuaa;

ohova'ekue mombyry

ndaha'éi cherayhu'ỹgui;

morotĩ sakã osyry

hováre pe tesay

 

ha che katu apyta

tyre'ỹ, ndavy'avéi;

cherasẽ; che’anga'u

hapykuerére oveve,

ha ára ha pyhare

ku yvu morotĩmícha

che ángape opupu;

che ruguýpe osyry,

ha chupe guaránte che.

 

Toúkena katuete

che keguýpe chejopy

Toĩmi’anga chendive

okañy meve jasy;

ha ijuru pukavymi;

che rehe tojetu’u,

upéicharó añandúne

vy’a tesaraipyre.


 

CHEAÑO PETEĨ

 

Ambotororéta

ko che mborayhu

jahecha ndokéipa

che mba’embyasy.

 

Ajehesaupi

Ha ahecha yvate

okañy mimi

arai kupépe

jasy morotĩ

ha che mandu’a

ako pyhare

eréramo chéve:

chéko nemba’e.

 

Ndaipóri voi

nembojojaha

che mborayhumi;

ndajuhumo’ãi

ambue ndéichagua

cherupiva’erã

amo yvate

omimbihápe

yvága rape.

 

Ejumi jeýna

che mborayhumi

ha chembotavy.

 

Marãve ndoikói,

chéko rohayhu,

ha ndaikosevéi

cheaño peteĩ

kóicha tyre’ỹ.


 

 

CHE AIKUA
 

Nde cherayhu,

che rohayhu miñaẽ,

tove tahayviru’i

jasy rata ñande ári

ha toveke toma’ẽ

ñande rehe Ñandejára.

 

Che aikuaa...

Yvágajara

ñaneme’ẽ ojupe.


 

CHE RETÃ
 

Ahekáta ñasaindy

maymárõ okepa jave

apoi haĝua oveve

guyrami pepo hovy.

 

Mombyry aipota overa

jasy ratáicha ipepo

ha yvágui aipo’o

yvoty ndéve guarã.

 

Nepórã ha ne’arandu

ndaipóriva ndéichagua

ha aipotáva rejuhu

ndejupe pytu pyahu.

 

Mba'éichatamora'e

Ñandejára cherendu

ha oĝuahẽ ndéve ĝuarã

vy’a ha marangatu.

 

Ha maymárõ rohayhu

torýpe romba'apo

ikatu haĝua oveve

yvytúicha nde pepo.

 

Remimbi amo yvate

hendyhápe pe jasy

oñohẽva ko yvy ári

henimbo saká asy.

 

Aipota ndéve ĝuarã

tendota johéi pyre

opa haĝua ndehegui

ñembyahýi ha pyhare.

 


 

KARAI VOSA

 

Ekékena ne mitã

hakuete ko kuarahy,

ani angatei ndepyhy

ohasávo karai vosa.

 

Mombyrýjeko oho

ha ohechávante oipota

reke’ỹrõ asajekue

ndepyhýne katui;

ne mitã akãhatã.

 

 

PARAGUAY
 

Asapymi ha ahecha

che keguýpe nde arai,

ára rú’ãre oguata

nde jasy marangatu,

che renoivaicha niko

ohasávo henimbo morotĩmi

ha che ángape añandu

chejopy techaga'u.

 

Mombyryetéko

reime chehegui Paraguay,

umi nde arasa poty

oĝuahẽ chemyangekói,

che retepýpe osyry

paraguaiete ruguy,

che py'ápe reikove,

resapukái cherenói.

 

Apáy ha ndorojuhúi

che ypýpe Paraguay;

Hi’ãnte chéve aha

aĝuahẽmi ne rendápe,

ysapy omyakỹ jave

kapi’ipe rovyũ.

 

CHeñuá haĝua che páype

vy'ami marangatu.

 

Norteamérica-1966


 

KURUSU "CAUTIVO"

 

Kurusumi remimbíva

che ypýpe ymaite guive

cherayhúguima rejuha

repytávo chendive.

 

Aníkena chereja

che mborayhumi "cautivo”

ema’ẽkena cherehe

aikove puku aja.

 

Nderehénte ajetu'u

ha nde pópe ahykuavo

che rekove, che ñe’ã,

che resay, che ãho.

 

Ne’ĩrãvako ajuhu

marangatu ndeichagua

ha ndévente ajerure

cherovasami haĝua.

 

BIOGRAFÍA - IDA TALAVERA

Ida Talavera de Fraccia hi'arareñói Paraguaýpe 1910-pe. Oñemoarandu ypy Trinidad mbo'ehaópe. Ha'e omoñe’ẽ meméva ñe’ẽporãhaipyre opáichagua ha ijyképe oñemoarandu inglés, francésha portugués.

Josefina Plá he'i Ida rehe aipójeko oĩ umi kuña paraguái ñe'ẽpotyhára apytépe Heta oñe'ẽpoty'apo haomombe’urã'apo Ohai guarani ha castellano-pe Ha'e niko ombohekosãso ha ombohekoambue pe ñe'ẽpoty rekove Hembiapokue hesakã ha ipypuku avei

Ojepytaso hekove pukukue omombareteve haĝua ñane retã

Rembikuaa. Iñe'ẽpotyruru castellano-pegua hera "ESTO ES ANDAR",kóva omoherakuã Editorial Péndulo amo 1966-pe. Ida ohaiporãháicha avei opintakuaaitemi va'ekue.

Ida Talavera omano 1993-pe peteĩ arakõi jasyporundýpe. «Iñe’ẽpoty niko mombyry ojere pujoja ha métrica-gui. Ha upéicha avei ñanemomandu’a umi hapicha kuña ymaveguare ñe’ẽpotyre, taha’e Safo guive Santa Teresa peve Europa-pe, taha’e Sor Juana Inés guive Gabriela Mistral peve América-pe.

 

 

 



Compartir FB

Ver Perfil y otras Obras del Autor...


 

Leyenda:
Solo en exposición en museos y galerías
Solo en exposición en la web
Colección privada o del Artista
Catalogado en libros en artes visuales o exposiciones realizadas
Venta directa
Obra Robada

Buscador PortalGuarani.com de Artistas y Autores Paraguayos
 

Portal Guarani © 2014
Oficina: Asunción Super Centro - Gral. Diaz entre 14 de Mayo y 15 de Agosto - Local 372, 2do. Piso
TeleFax.: 451-486, Celular: 0981 564-220 - Contacto: info@portalguarani.com
PortalGuarani.com en fuente oficial de informaciones e imágenes del Paraguay para Wikipedia.org
Asunción - Paraguay - Proyecto Desarollado por Apunto