SOLDADO GUARANI
Letra de EMILIANO R. FERNÁNDEZ
SOLDADO GUARANI
Jha soldado guaraní
resëva mamo reígui
reyu vaecue nde sy mígui
Chaco py remboyere
ne retä rejhayjhuete
jha reicóma jhayjhupápe
remoirü nde ruvichape
ñorairö ypyguive.
Ne machete jha ne ty'äi
nde arado nde azada
umíva remboykepáva
mbocarema nde poyái
ne retä ndereipotái
opyta aimara poguýpe
reyajhu seve nde ruguýpe
remboayévo PARAGUAY.
Rejheya nde ru nde sy
jha opa mba'e rerecóva
nde tayse jha nde róga
rerecóva ijhayjhupy
nde recojha yvotyty
reicomi jhague vy'ápe
jha ágä CHACO ruguápe
reicuave'ë nde ruguy.
Nde tapyimi ca'avo
oñemondéva yvotýpe
vy'a mborayjhu torýpe
co'e jha remba'apo
jha upégui tare'ynpo
ñereñói vaecue cu'ápe
rejhuvaitivo aimarape
reyuca tera remano.
Tuichaitéva tapere
rejheya nde róga pýpe
angata nde ru nde sýpe
ojhecha ramo ne angue
jhovyüva nde cocue
oime vaerä ñanandýpe
jha nde CHACO ca'aguýpe
rembuajhéi nde recove.
Oye cuaáco nderejhe
oicóva ñemoirü jhara
nandereyái ÑANDEYARA
árape ni pyjhare
ñorairö jhape reike
ne retä nde py'a pýpe
jha upérö ñembyasýpe
ndojhasái nde recove.
Ñu mbyterupi pyjhare
pe amo reten mombyrýpe
romongeta yasy endýpe
reimeramo ne añoite
ne mandu'a upe yave
ne rembiayjhu poräitére
rereco sente ndeykére
jha teremano upe rire.
Manógui nde resarái
rejho guive acä racupe
cañon jha metralla púpe
kyjhyye nde reicuaái
nde'y ujhéi jha na jhi'äi
reyevy nde rakycuévo
rejhechauca pota vevo
nde jhecojha paraguái.
Jha guaraní ra'yre
reiméva ñorairo jhápe
mombype guýpe jha ocápe
apa'a ndéco jha’e
ne retä ndive reime
reipe'a aimará busúgui
nde tricolor rejhayjhúva
chéco PARAGUAY ere.
Fuente:
CANCIONES PARAGUAYAS DE AYER Y DE HOY - TOMO I
Recopilación:
MARIO HALLEY MORA
y
MELANIO ALVARENGA
Ediciones Compugraph,
Asunción-Paraguay 1991 (192 pág.)
*****
IMÁGENES DE NUESTRO HERMOSO PARAGUAY
Fotografía de FERNANDO ALLEN
ENLACE A LA GALERÍA DE MÚSICA PARAGUAYA
EN PORTALGUARANI.COM
(Hacer CLICK sobre la imagen)
Letras de Música Paraguaya
MÚSICA PARAGUAYA - Poesías, Polcas y Guaranias - ESCUCHAR EN VIVO - MP3
MUSIC PARAGUAYAN - Poems, Polkas and Guaranias - LISTEN ONLINE - MP3
|