Epukavymína mitãkuña che mborayhujára
Tahecha jevy nde juru mboypýri nde ratypykua,
nde roya yképe ikuãme oikutúva'ekue Ñandejára
ha ipyko’ẽmíva opyta opupu mborayhu ykua.
II
Ka’aru pytữ jasy tomimbi nde rova mbytére ha tory rupápe toñoñañua ñane mborayhu
tuka’ẽ ra’ãvo oñondivete tojeity ojuapére
tojahu hikuái nde ratypykuápe upe ka’aru.
III
Epukavymína mitãkuña che py’a ra’ãva
hoy’umisetéko ipepo paráva upe ñahatĩ
nde ratypykuápe guare ymínte oipy'a jukáva
ha ipepo akãmínte omoakysete mokõi panambi.
IV
Nde rova yképe ikuãme oikutuva’ekue Ñandejára, ha ipyko’ẽmíva opyta opupu mborayhu ykua;
repukavymírõ mitãkuña che mborayhu jára,
taropurahéi nde juru mboypýri nde ratypykua.
