TADEO ZARRATEA
**/**
MAINUMBY PYTÃ
Mainumby pytã
Yvoty poty.
Ysapy rekávo reikóva ndepeporyapu.
Ysyry ypy, guata katuete,
ava rete kuápe remombo rerúva kambysy yma.
Ytu guasuete. Ysau raity. Yvu ypykue.
Yvytu memby nde pepo rague.
Yvy potymi. Tekove yta.
Rekambuvaipo yvága yguápe, añeporandu.
Mamóguitepa mbarete reru
ajeve ramo ku ndereikuaái tapytu'umi.
Mbiriki ryapu.
Ava mbaraka rekuchupa’ỹva.
Angekói ryru. Angata rupa remumu mantéva.
Retytýi asýva kerasy poguýpe.
Ipáy, ikeguýpe, ikéra mbytére reñangarekóva
kerambu reípe.
Ani nekangy. Ani repyta.
Tove tekove taipotykuru, taipotyjera.
Kerasy ñaña ani rembyaty.
Toikovemive.
Ikerayvoty tokakuaave.
Pe yvy guata neremimoingo
topukavymi omano mboyve.
TADEO ZARRATEA
**/**
IPOYHU PORE
Tenonderete ñembokihare
ahayhu vai nipóne yma.
Ahayhu hesa, hembe, hetyma.
Tenonde hova.
Ahayhu heko ha opa iguata.
Héra ahenduse ku manterei.
Hógape ahase ahendu ipuka.
Hapére aguata, aiko, aiko rei.
Che akã hakupa ahenói hague.
Inambi ambyaku pyhare rei.
Hendami rekávo che kéra aguata.
**/**
Upéramo aiko yvate voi.
Yvytu hory...
Tekove hovyngy.
Hayvi mandu'a.
Hendy mborayhu.
**/**
Ha upéi katu,
hoky, hovana, kerasy vai.
Havẽ mandu'a.
Osapy ipuka. Hova oñopymi.
Ogue ñepyrũ, ogue mbeguemi.
Ohórõ ohove, ha añandu vai.
Ipohýita voi tekove nandi
gueroguatave,
henyhẽ rire ichugui meme.
**/**
Tesarái hagẽ, ohapy hova.
Hypa ipukavy.
Ogue hataindy, yvytúre oho.
Ndohopa va'ercãi. Amuñamive.
Mandu'a ipokã, ou ha oho.
Huguáire apo, añekarama.
Aipyhy porã. Aryrýi hese
ani ikusugue.
**/**
Ha upérõ atopa
ndahayhúi hesa.
Ndahayhúi hembe.
Ndahayhúi hete.
Mandu'ántema ahayhu ra'e.
Aramboha ári ipotypa va'ekue.
**/**
Ha péina ãga ápe.
Ãgaite peve.
Che ánga rováre,
pytãrovyngy.. .
ipoyhupore.
TADEO ZARRATEA
**/**
Fuente:
ÑE’ẼPOTY ATY – VOCES DE POETAS EN GUARANÍ
por FELICIANO ACOSTA y
NATALIA KRIVOSHEIN DE CANESE
Editorial Servilibro, Asunción-Paraguay 2005
Diseño de tapa y diagramación: Claudia López – Bertha Jerusewich
**/**
MAITEI
** Revista Bilingüe de Cultura "Ñemity" hetaite ojepytaso ha ohypyi rire kuatia rogue, omboapy isapukái ohenduka hağua opaite yvytu vevére "NE’ẼPOTY ATY" (VOCES DE POETAS EN GUARANÍ) purahéi, sapukái, ñembyasy ha ñe’ẽ ymaite guivéma ojokava'ekue yvytu ha omboryrýi ñane retã, pytagua yvy guaraní ñe’ẽ ñemyerakuã rekávo.
** Feliciano Acosta ha Natalia de Canese, ikatukuaáta he’i ojupe omono’õhahína iñemitỹnguerakue ko tembiapo rupive ha katuete ikorasõrorýta hikuái oma’ẽvo umi tape oipykuimava'ekuére. Ha mba'éguipa nahanirimo’ãi ohechávo mba'éichapa ñe’ẽpoty ra’ỹi mimi opororopa ñemitỹ pyporépe ha ipotyjeraverei ko siglo XXI-pe oğuahẽvo.
** NE’ẼPOTY ATY (VOCES DE POETAS EN GUARANÍ) niko tuichaiterei omombareteve Paraguái ñe’ẽpoty guaranimegua angapy ha ndaha'éi umi ñepyrũ rã guive ramoite peve oñemyerakuãva'ekuépe ñónte. Nahániri, uvei umi ipype oĩ’ỹvape ha ko’ẽrõ ára oĩtavape.
** Añetehápe iporã ñamomba'eguasu ãichagua tembiapo, jaikuaahápe mba'eichaitépa tapicha yvypóra ñane ñe’ẽ rayhuhára ojepokyty yvýre, omyerakuã ha ohayhuka hağua ñane mba'e teéva.
** Ñe’ẽpapára Carlos F Abente, Feliciano Acosta, Wilfrido M. Acosta, Mario Rubén Álvarez, Juan Manuel Ávalos, Gumersindo Ayala Aquino, Zenón Bogado, Estela Caballero, Basiliano Caballero, Herib Campos Cervera, Domingo Cano, Narciso R. Colmán, Susy Delgado, Emiliano R. Fernández, Félix Fernández, Lucila Fernández, Sabino Giménez, Félix de Guarania, Carlos Martínez Gamba, Miguel Ángel Meza, Teodoro S. Mongelós, Víctor Montórfano, Manuel Ortiz Guerrero, José G. Perazo ha Luís Szarán, Marcelino Pérez Martínez, Augusto Roa Bastos, Ramón Silva, Lilian Sosa, Ida Talavera, Domingo Cano, RudyTorga ha Tadeo Zarratea rembiapokuerakue, péina oñomopeteĩ oipykúi hağua "ÑE’ẼPOTY ATY" rape asyete jey oñeñandukase ha oñehendukaségui.
** Ikatu nga'u ra’e Paraguáiva ohecharamo ha ohayhu jey upe heko teéva ko ñe’ẽpoty aty rupive ha anive ñañeme’ẽ oimeraẽ guelelereípe ñaneguenohẽse katuíva ñande rapégui ñaimo’ã’ỹhágui ha ñaimo’ã’ỹhápe.
** Ñemoñare pyahu oma’ẽ hağua mombyryve iko’ẽ rãre tekotevẽma opóy ha ojetyvyro. Ko mba'épe katu oğuahẽta katuete oñemitỹ meme ramo iñapytu’ũ ngua ha ikorasõme peichagua tembiapo joheipyre ñanembopy’arorýva. - MAUROLUGO.
