IRUNDY ḠUAIḠUIMI (SHAW NICHOLAS GINAN-pe ḡuarã) - Ñe’ẽhaihára PEDRO ESCURRA FRANCO

IRUNDY ḠUAIḠUIMI

(SHAW NICHOLAS GINAN-pe ḡuarã)

Ñe’ẽhaihára PEDRO ESCURRA FRANCO.

Te’ỹi Guana, irundy ḡuaiḡuimi oñe’ẽñe’ẽ,

yvytúre oveve ohóvo oheka umi apysápe,

oñomomgeta oñondivemi ñande arapýre,

ipehẽnguekuéra ipyahẽpyahẽ umi tapére.

Yvy  ka’avo  oheka  umi  yva  re’ẽngue,

ponandi  yvy ombojerepa  oñemitỹjere,

yvyjejo’o  karurã jehekase  ñemoñe’ẽ,

ohendu umi kuña oñandu pya’ete hekove,

omuñase  hekove apyre’ỹre guana atýre,

iñe’ẽnguera opu’ãse oikoseve  yvy’apére,

Irundy ḡuaiḡuimi ombyaty iñe’ẽ ome’ẽ,

pyguýre yvyryrýi, yvyraty pytumi oñe’ẽ,

umi ohóva’ekue ava guana ñe’ẽ roguére,

ñe’ẽrendy  yvytúre otiri ha oguejy yvýre,

Eiretégui umi ñe’ẽ otykytyky ayvúpe osẽ,

ḡuaiḡui ñe’ẽ oho ojoykére guyráicha oveve,

ipytu  pyahẽ osyry mbeguekatu  apysápe,

umi ḡuaiḡuimi guana pytúgui ñe’ẽperere,

Tekoasýgui tekove ñe’ẽjehesy  ãngapýpe,

hekovére oñeporandu iñe’ẽme mba’ére,

ndopaséi  iñe’ẽndi ndopamo’ãi iñe’ẽ omoñe’ẽ,

ojerure opávo ojerurévape  pe ikũre ojerure,

Ko’ã kuña te’ỹi yvýre opyrũseve oikosevénte,

hekovekuéra oñe’ẽseve ohóvo  otimbo tatatĩme,

anichéne omano iñe’ẽ anichéne ojejuvy ñe’ẽ,

ka’aguy opytáne tyre’ỹ guyraita ñe’ẽ hasẽne,

Hetaitéma guana oipo’o tekotevẽ  ko yvy’apére,

amóntema opytu’úne piro’y apytépe ojuhúne,

yvyjara’ỹ oñembojára okaru yvymi koráre,

opo’o  yvýgui  opo’o  guanáme omuña tekotevẽ,

umi isapukairasy oveve umi guyráre araíre,

hete ry’aikuéra osyry oguejy hypa umi tapére, 

Avave nomomba’éi mba’eve ñande yvýpe,

ára puku tuja te’ỹi ḡuaiḡuimíme omuñaseve.

ENLACE INTERNO A ESPACIO DE VISITA RECOMENDADA

(Hacer click sobre la imagen)