TIEMPO DE NAVIDAD
29 DE DICIEMBRE AL 7 DE ENERO
LECTURAS EN IDIOMA GUARANÍ
COMPAÑÍA DE JESÚS - JESUITAS DEL PARAGUAY
29 DE DICIEMBRE
( DÍA V DENTRO DE LA OCTAVA DE NAVIDAD)
KUATIAÑE’ẼPETEĨHA SAN JUAN OHAIVA´EKUE 1 Jn 2, 3-11
Che pehenguekuéra:
Jajapórõ Tupã rembiapoukapy, jaikuaa porã jaikuaaha chupe. 4 Oĩrõ he'íva: “Che aikuaa chupe”, ha ndojapói hembiapoukapy, upéva ijapu ha nde'íri pe añetegua. Ojapórõ iñe'ẽ katu, Tupã rayhu oĩ hekopete ipype ha ikatu jaikuaa ñane peteĩha hendive. Pe he'íva ipeteĩha Tupã ndive, oikova´erã
Jesucristo oiko haguéicha.
Che pehẽnguekuéra pohayhúva, ko tembiapoukapy ahaíva peẽme ndaha'éi ipyahúva, upe perekómava´ekue iñepyrũha guivénte uvei. Opáichavo ipyahu avei ha iñañete Crístope ha pende pype avei, pe pytũ ohasámagui ohóvo ha ohesapéma pe tesapeha añeteguáva.
Oimérõ he'íva oĩha tesape rendýpe, ha ndaija'éi ipehẽnguére, oĩ gueteri pytũmbýpe. Pe ohayhúva ipehẽnguépe katu oiko tesape rendýpe ha noñepysãngái. Pe ohayhu'ỹva hapichápe katu, oikove aja oiko pytũmbýpe, ha ndoikuaái mamópa oho, pe pytũ oheja haguére chupe ohecha'ỹre.
SALMO 95, 1-3. 5b-6
PEROPURAHÉI ÑANDEJÁRAPE PURAHÉI PYAHU.
Peropurahéi Ñandejárape purahéi pyahu.
Topurahéi Ñandejárape opa ko yvy.
Pepurahéi Ñandejárape, héra pemomba'e.
Opa árape pemoherakuã
ha'e oporoguenohẽha jejopy vaígui.
Pemombe'u opa tetã rupi
ha maymávape, ha'e tuichaha,
ha umi mba'e hechapyrãva ha'e ojapóva.
Ñandejára katu yvága apohare hína,
teko jajái ha teko mimbipa ijerére oĩ,
hekoha iporãitéva pokatúgui henyhẽ.
EVANGELIO
ÑANDEJÁRA JESUCRISTO REKOVE HA HEMIMBO’E SAN LUCAS OMOMBE’U HÁICHA
2, 22-35
Oguahẽvo ára oñemopotĩ haguã, he'iháicha Moisés rembiapoukapy, ogueraha hikuái pe mitã Jerusalénpe omoĩvo Ñandejára renondépe. Ojapo hikuái upéva, upéicha oĩgui Ñandejára rembiapoukapýpe, he'íva: “Opa mitã kuimba'e ijypykuéva oñemboykeva´erã Ñandejára peguarã”. Aipórõ oho hikuái omba'e kuave'ẽvo, he'iháicha Ñandejára rembiapoukapy: mokõi jeruti, ỹrõ katu mokõi pykasu ra'y.
Umíva umi árape oiko va´ekue Jerusalénpe peteĩ kuimba'e hérava Simeón, hekojoja ha iporiahurereko katúva, ha oha'arõva osẽ Israel ñepysyrõva. Espíritu Santo oĩ Simeón ndive, ha oikuaauka ra'e chupe nomano mo'ãiha ohecha mboyve pe Mesíaspe, Ñandejára omboútava. Espíritu Santo ogueraha Simeónpe Tupaópe ipógui, ha oguerahávo mitã Jesúspe itúva ha isy ojapo haguã Tupã rembiapoukapy he'íva, Simeón ohupi pe mitã ijyva ári ha omomba'e guasu Tupãme kóicha:
“Ko'ágã, che Jára, rejapóma ne ñe'ẽ: ikatúma reheja omano ko ne rembiguái py'a guapýpe.
Ahecháma reñepyrũha reporopysyrõ opa tetã renondépe, pe mba'e rendy ohesapepátava opa tetãme,ha omomimbipátava ne retã Israélpe”
Jesús ru, ha isy, opyta ijurujái ohendúvo Simeón he'íva pe mitãre. Aipórõ Simeón ohovasa chupekuéra, ha he'i María, Jesús sýpe: Ema'ẽ, ko mitã heta Israel guápe oity térã omopu'ãta. Ha'éta peteĩ mba'e rechaukaha, ha hetáta ojahéiva hese ikatu haguã heta py'apy pegua ojekuaa. Ha opa ko'ã mba'e, peteĩ kyse pukúichata ndéve guarã, nde py'ápe voi nde kutútava.
Ñandejára Jesucristo Ñe’ẽ.
30 DE DICIEMBRE
( DÍA VI DENTRO DE LA OCTAVA DE NAVIDAD)
KUATIAÑE’Ẽ PETEĨHA SAN JUAN OHAIVA´EKUE 1 Jn 2, 12-17
Che ra'ykuéra pohayhu etéva, ahai peẽme Tupã, Jesucristo rupi, oheja rei haguére pene angaipa. Túvakuéra, ahai peẽme peikuaágui upe oikomava´ekuépe iñepyrũha guive. Mitã rusukuéra, ahai peẽme pende pu'aka haguére iñañávare.
Ahai peẽme, che ra'ykuéra pohayhu etéva, peikuaa haguére pe Túvape. Ahai peẽme, túvakuéra, peikuaa haguére upe oikomava´ekuépe iñepyrũha guive. Ahai avei peẽme, mitã rusukuéra, pene mbaretégui ha perohory Ñandejára Ñe'ẽ pende py'apýpe, ha pende pu'aka iñañávare. Ani pehayhu yvypóra reko térã oĩva ipype. Ohayhúva yvypóra reko ndohayhúi pe Túvape. Mba'eve ha'e oikuave'ẽvagui ndoúi pe Túvagui, chugui voínte uvei ou. Kóvahína pe ha'e oikuave'ẽva: yvypóra rekove rembipota vai, yvypóra reko katu opa ohóvo opa hembipota vai reheve. Upe Túva rembipota ojapóva katu oikove opa árape guarã.
Tupã Ñandejára ñe’ẽ.
SALMO 95, 7-10
PEROPURAHÉI ÑANDEJÁRAPE PURAHÉI PYAHU.
Pemomba'e guasu Ñandejárape opa tetã nguéra,
pemomba'e guasu Ñandejárape ha'e ipokatu ha omimbipágui,
pemomba'e guasu Ñandejárape héra tuichágui.
Itupao róga guýpe pemoguahẽ pene mba'e kuave'ẽ.
Pemomba'e guasu Ñandejárape ojehechaukáva heko marangatúpe.
Opa yvypóra henondépe toryrýi.
Toje'e opa tetã rupi: “Ñandejára ñande ruvicha guasuhína”.
Hatã omoĩ hendápe ko yvy, ha ndaipóri omongu'éva.
Ha'e oisãmbyhy teko jojápe tetãnguéra.
EVANGELIO
ÑANDEJÁRA JESUCRISTO REKOVE HA HEMIMBO’E SAN LUCAS OMOMBE’U HÁICHA
2, 22. 36-40
Oguahẽvo ára oñemopotĩ haguã, he'iháicha Moisés rembiapoukapy, ogueraha hikuái pe mitã Jerusalénpe omoĩvo Ñandejára renondépe.
Upe jave upépe oĩ aveihína peteĩ maranduhára kuñáva, Penuel rajy, hérava Ana, Aser ñemoñaréva. Iguãiguĩmava. Omenda ra'e imitãme gueteri, ha oiko iména ndive 7 áño; ojapóma hína 84 áño opyta hague mena'ỹre. Araka'eve nosẽiva Tupaógui, ha omomba'e guasúva Ñandejárape ára ha pyhare okaru'ỹre ha oñembo'ehápe. Ana oguahẽ upe jave ha oñepyrũ ome'ẽ ijaguije Tupãme. Ha oñe'ẽ pe mitã Jesús rehe umi oha'arõvape Jerusalén ñepysyrõ.
Ojapopa rire Ñandejára rembiapoukapy he'íva, oho jevy hikuái Galiléape, itáva Nazarétpe voi. Ha pe mitã okakuaa ha ko'ẽre imbareteve, henyhẽ arandúgui ha Tupã ohovasa chupe.
Ñandejára Jesucristo Ñe’ẽ.
31 DE DICIEMBRE
( VII DENTRO DE LA OCTAVA DE NAVIDAD)
KUATIAÑE’Ẽ PETEĨHA SAN JUAN OHAIVA´EKUE 1 Jn 2, 18-21
Che ra'ykuéra pohayhu etéva, ára pahaitéma niko. Peẽ pehenduva´ekue
outaha pe Crístore opu'ãva ha oñemoĩva hendaguépe. Ha péina ko'ágã voi oĩma heta opu'ãva Crístore. Upévare jaikuaa ha'emaha pe ára paha. Ha'ekuéra osẽva´ekue ñande apytégui, añetehápe katu ndaha'éiva ra'e ñande rehegua, ha'e rire ramo niko opytava´erã mo'ã ñane ndive. Ha upéicha ojehu ojekuaa porã haguã nda opavaveiha ñande reheguáva.
Peẽme katu Cristo, pe Imarangatúva, pene mboykeva´ekue imba'erã, Espíritu rupi, ha opavave pereko upe mba'e kuaa. Ahai peẽme ndaha'éi peikuaa'ỹgui pe añetegua, peikuaágui uvei, ha peikuaa ndaikatuiha mba'eveichagua japu osẽ pe añetégui.
SALMO 95, 1-2. 11-13
PEROPURAHÉI ÑANDEJÁRAPE PURAHÉI PYAHU.
Peropurahéi Ñandejárape purahéi pyahu.
Topurahéi Ñandejárape opa ko yvy.
Pepurahéi Ñandejárape, héra pemomba'e.
Opa árape pemoherakuã
ha'e oporoguenohẽha jejopy vaígui.
Tovy'a yvága ha yvy.
Tosununu pe yguasu ha opa ipype oĩva.
Tovy'a umi ñu ha opa mba'e ipype oĩva.
Vy'águi tosapukái umi yvyra ka'aguy pegua.
Tojepurahéi Ñandejára renondépe,
ha'e ou ko yvy oisãmbyhy haguã.
Tekojojápe ko yvy oisãmbyhýta, ha añetépe tetãnguéra.
EVANGELIO
ÑANDEJÁRA JESUCRISTO REKOVE HA HEMIMBO’E SAN JUAN OMOMBE’U HÁICHA
1, 1-18
Iñepyrũmbýpe oikomava´ekue voi Ñe'ẽ, ha pe Ñe'ẽ oĩva´ekue Tupã ndive, ha Tupã va´ekue voi ha'e. Iñepyrũmbýpe, ha'e oĩva´ekue Tupã ndive. Ha'e rupi, Tupã ojapo opaite mba'e, ha ndaipóri mba'eve Tupã rembiapokue apytépe ojejapova´ekue hese'ỹ. Upe ñe'ẽme oĩva´ekue tekovete, ha pe tekovete ohesape yvypórakuéra rekove. Ko tesapeha omimbi pe pytũmbýpe, ha pe pytũ katu ndaikatúi ombogue chupe.
Tupã omondo peteĩ hembiguáipe, hérava Juan Bautista, ha'e omombe'u haguã opavavépe ko tesapeha, mayma ohendúva chupe oguerovia haguã
upe he'íva. Juan ndaha'éiva´ekue upe tesapeha. Oñemboúnteva´ekue
ha'e oñe'ẽ haguã pe tesapeháre. Ha pe tesapeha, tesapeha añetegua va´ekue
oúva ko yvy ári ohesape haguã opavavépe.
Pe ñe'ẽ oĩva´ekue yvy ári. Ha Tupã ojapo ramo jepe opa mba'e Ha'e rupi, umi yvy arigua ndoikuaaséi chugui mba'eve. Hetã teépe ou, umi hetãgua katu nomoguahẽi chupe. Umi chupe omoguahẽva´ekue ha hese ojerovia va´ekuepe katu omoingo Tupã ñemoñaréramo. Umívagui oiko Tupã ñemoñare, ha ndaha'éi ku yvypóraicha yvy túva ha sy oiko haguére oñondive, nahániri. Tupãite voi omoingo chupekuéra iñemoñare ramo.
Upe ñe'ẽ ouva´ekue yvyporaitéramo ha oiko ore apytépe, mborayhu ha añetégui henyhẽ. Ore rohechava´ekue heko marangatukue Túva ome'ẽva´ekue chupe, ta'ýra peteĩete haguére ha'e. Juan hese oñe'ẽva´ekue
he'íramo guare: “Kóvahína upe che mandu'a hague ha'éramo guare: ‘Upe oúva che rire mba'e guasuve che hegui, oikove haguére che aikove mboyve.’”
Ha'e, henyhẽ rupi mborayhúgui, ore rovasa jo'a-jo'a. Tupã niko ome'ẽva´ekue hembiapoukapy Moisés rupi, mborayhu ha añete katu ou Jesucristo rupi. Ndaipóri avave Tupãme ohechava´ekue. Ta'ýra peteĩete, peteĩchava Tupã ndive ha oĩva Túva ykére, ha'e oikuaauka chupe opavavépe.
Ñandejára Jesucristo Ñe’ẽ.
2 DE ENERO
KUATIAÑE’Ẽ PETEĨHA SAN JUAN OHAIVA´EKUE 1 Jn 2, 22-28
Mávapa pe ijapúva? Upe he'íva Jesús ndaha'eiha pe Cristo. Upévahína pe Crístore opu'ãva ndoikuaaséigui mba'eve Túva ha Ta'ýragui. Umi ndoikuaaséiva mba'eve Ta'ýragui, ndoguerekói hendive Túvape. Pe oguerohorýva Ta'ýrape katu oguereko hendive Túvape.
Upévare peẽ peñongatu pende py'apýpe upe ñe'ẽ pehenduva´ekue
iñepyrũha guive. Ha upe pehenduva´ekue iñepyrũha guive opytárõ pende py'ápe, peẽ avei peiméta Ta'ýra ndive ha Túva ndive. Kóvahína upe Jesucristo he'iva´ekue ome'ẽtaha: Jeikove opa'ỹva.
Ahai hína peẽme umi pene mbotavysévare. Peẽ katu pereko Espíritu marangatu, Jesucristo pene mboyke hague rupi imba'erã, ha napeikotevẽi avave pene mbo'e, pe Espíritu ha'e ome'ẽva´ekue pende reko mbo'e rupi opa mba'ére, ha umi hemimbo'epy añeteguahína, ndaha'éi japu. Pepytáke peteĩ py'ápe Cristo ndive, Espíritu pene mbo'e haguéicha.
Ko'ágã, che ra'ykuéra pohayhu etéva, pepyta peteçipy'ápe Cristo ndive, ikatu haguã jajerovia hese ha'e ojechaukárõ, ha ani ñatĩ henondépe ha'e oúvo.
SALMO 97, 1-4
ÑANDEJÁRA OHECHAUKA IPOKATU
Pepurahéi Ñandejárape purahéi pyahu,
mba'e hechapyrãva ojapógui ha'e.
Ipyapy mbarete ha imarangatúgui ipu'aka opa mba'ére.
Ñandejára ohechauka ipokatu,
tetã nguérape ohechauka hekojojaha.
Imandu'a imborayhu ha heko jeroviaháre tetã Israel ndive guarã.
Yvy jerekuévo ojehecha
Tupã ipu'akaha opa mba'ére.
Tojererohory Ñandejára yvy jerekuévo,
purahéi rory tosoro ha tojevy'a
EVANGELIO
ÑANDEJÁRA JESUCRISTO REKOVE HA HEMIMBO’E SAN JUAN OMOMBE’U HÁICHA
1, 19-28
Judío myakãhárakuéra omondo pa'ikuéra ha umi Tupã rembiapoukapy mbo'eha Juan rendápe, oporandu haguã chupe mávapa ha'e. Ha ha'e he'i porã chupekuéra: Che ndaha'éi pe Mesías.
Oporandu jevy chupe hikuái: Máva piko nde péicharõ? Ndaha'éi mba'épa maranduhára Elías?
Juan he'i: Nahániri.
He'i chupe upémarõ hikuái: Nde piko hína ku maranduhára ouva´erãva?
Juan he'i chupe kuéra: Nahániri.
He'i chupe hikuái: Emombe'u oréve mávapa nde. Umi ore mbouva´ekue rendápe rohova´erã ro'e mávapa nde. Mavaha nde ere nde jehe?
Juan he'i chupekuéra: Che niko peteĩ osapukáiva yvy ojeiko'ĩháme, he'íva: ‘Pembosako'i Ñandejárape haperã’, he'i haguéicha maranduhára Isaías.
Umi ouva´ekue oñe'ẽ haguã Juan ndive, fariseo rembijokuái, oporandu chupe upémarõ: Nde ndaha'éi ramo pe Mesías, ha ndaha'éiramo maranduhára Elías térã pe maranduhára ou va´erãva, mba'ére reporomongarai reikóvo?
Ha Juan he'i chupekuéra: Che niko ýpe aporomongarai. Pende apytépe katu oĩ peteĩ peẽ peikuaa'ỹva, oútava che rire, ha chéve ija'ỹva ajora chupe ipy rehegua sãnte jepe.
Opa ko'ã mba'e ojehu, táva hérava Betániape, opytáva ysyry Jordán ári, kuarahy resẽ gotyo.
Ñandejára Jesucristo Ñe’ẽ.
3 DE ENERO
KUATIAÑE’Ẽ PETEĨHA SAN JUAN OHAIVA´EKUE 1 Jn 2, 29 ¾3, 6
Peikuaáma Cristo imarangatuha, peikuaava´erã avei aipórõ, opa umi oikóva teko jojápe, Tupã ra'yha.
Pema'ẽmi mba'éichapa ñande rayhu Tupã pe Túva, ikatu haguã ñañembohéra Tupã ra'y, ha ñande ha'e. Upévare yvypóra reko rayhuha na ñande kuaái, ndoikuaái haguére Tupãme. Che pehẽnguekuéra pohayhúva, ñande ha'éma Tupã ra'y, ha jepe ndojekuaáirõ gueteri mba'eichaguátapa ñande, jaikuaa, Jesucristo ojechaukávo, ha'eichaguataha ñande jahechátagui chupe ha'ehaichaite. Ha opa ojeroviáva hese oñemopotĩ, Jesucristo ipotĩháicha.
Ha iñangaipáva opu'ã Tupãre, pe angaipa niko ñepu'ã Tupãre. Peẽ peikuaáma Jesucristo ou hague yvy ári oipe'a haguã ñane angaipa, ha ha'e ndojapói hague mba'eveichagua angaipa. Aipórõ opa oĩva hendive peteĩ py'ápe ndoikovéi angaipa apópe, ha umi ojapova´ekue angaipa ndohechái ha ndoikuaái chupe.
Tupã Ñandejára ñe’ẽ.
SALMO 97, 1. 3cd-6
PEPURAHÉI ÑANDEJÁRAPE PURAHÉI PYAHU
Pepurahéi Ñandejárape purahéi pyahu,
mba'e hechapyrãva ojapógui ha'e.
Ipyapy mbarete ha imarangatúgui
ipu'aka opa mba'ére.
Yvy jerekuévo ojehecha Tupã ipu'akaha opa mba'ére.
Tojererohory Ñandejára yvy jerekuévo,
purahéi rory tosoro ha tojevy'a.
Árpa púpe Ñandejárape tojepurahéi,
mbaraka púpe chupe tojepurahéi.
Turu ha trompéta púpe tojepurahéi Ñandejára,
ñande ruvicha guasu renondépe.
EVANGELIO
ÑANDEJÁRA JESUCRISTO REKOVE HA HEMIMBO’E SAN JUAN OMOMBE’U HÁICHA
1, 29-34
Upe ára ambuépe, Juan ohecha Jesús oñembojaha ohóvo hendápe, ha he'i: “Péina ápe, Tupã ovecha ra'y oheja reíva iñangaipa opavavépe ko yvy ári. Ha'ehína upe che mandu'a hague ha'éramo: ‘Che rire oúta peteĩ tuichavéva che hegui, ha'e oikove haguére che aikove mboyve. Cheté voi, ndaikuaáiva´ekue mávanepa ha'e. Péicharõ jepe, aporomongarai aikóvo ýpe, maymáva Israelgua oikuaa haguã mávapa ha'e.’”
Ha Juan voi he'íva´ekue kóicha: “Ahecha Espíritu Santo yvágagui oguejýva, ha pykasúicha opyta hi'ári. Upérõ, che ndaikuaáiva´ekue mávanepa ha'e. Upe che mbouva´ekue aporomongarai haguã ýpe, he'i chéve: ‘Upe nde rehecháva Espíritu Santo oguejyha hi'ári, upévahína upe oporomongaraíva Espíritu Sántope. 34 Cheté voi ahechava´ekue, ha aikuaa porã Tupã Ra'yha ha'e.”
Ñandejára Jesucristo Ñe’ẽ.
4 DE ENERO
KUATIAÑE’Ẽ PETEĨHA SAN JUAN OHAIVA´EKUE 1 Jn 3, 7-10
Che ra'ykuéra pohayhu etéva, aníke avave pene mbotavy: oikóva teko jojápe, hekojoja, ha'e heko jojaháicha, upe mba'e vai apoha katu aña mba'ehína, aña hembiapo vaígui iñepyrũha guive. Upevarã voi ouva´ekue
Tupã Ra'y, ombyai haguã upe ojapova´ekue aña. Tupã ra'ýva guive ndoikói angaipa apópe, oguerekógui ipype voi Tupã rekove reñói, ha ndaikatúi hembiapo vaivévo, ha'égui Tupã ra'y. Ojekuaa mávapa Tupã ra'ykuéra ha máva mba'epochy ra'ykuéra. Oimeraẽ ndojapóiva iporãva térã ndohayhúiva ipehẽnguépe ndaha'éi Tupã ra'y.
SALMO 97, 1. 7-9
PEPURAHÉI ÑANDEJÁRAPE PURAHÉI PYAHU
Pepurahéi Ñandejárape purahéi pyahu,
mba'e hechapyrãva ojapógui ha'e.
Ipyapy mbarete ha imarangatúgui
ipu'aka opa mba'ére.
Yguasu ha ipype oĩva tahyapupa,
yvy ha opa ijapére oikóva.
Umi ysyry tojepopete,
ha yvyty kuéra tosapukái joa vy'águi.
Tojepurahéi Ñandejára renondépe
oúgui ko yvy oisãmbyhy haguã.
Ha'e oisãmbyhýta yvy teko jojápe
ha tetãnguéra teko marangatúpe.
EVANGELIO
ÑANDEJÁRA JESUCRISTO REKOVE HA HEMIMBO’E SAN JUAN OMOMBE’U HÁICHA
1, 35-42
Upe ára ambuépe, Juan oĩ jevyhína upépe mokõi hemimbo'ekuéra ndive. Ha ohechávo Jesúspe ohasaha ohóvo, Juan he'i: ‘Péina upépe Tupã ovecha Ra'y’. Juan remimbo'e kuéra mokõi ohendúvo upe Juan he'íva, osẽ oho Jesús rapykuéri. Upéi Jesús ojere ha ohechávo ouha hapykuéri, oporandu chupekuéra: Mba'e piko peheka? Ha ha'ekuéra he'i chupe: Mbo'ehára, moõ piko reiko?
Jesús he'i chupekuéra: Peju pehecha.
Ka'arúma upérõ. Ha oho hikuái Jesús ndive ohecha haguã moõpa oiko, ha opyta hikuái hendive pytũ meve.
Peteĩva umi ohendu vaekue Juánpe ha upéi oho Jesús rapykuéri hérava´ekue Andrés, ha Simón Pedro ryvyva´ekue ha'e. Ityvýra Simón rekávo raẽvete oho, ha he'i chupe: Oime rojuhu pe Mesíaspe, he'iséva Cristo. Upéi, Andrés ogueraha ityvýra Simón, Jesús rendápe. Jesús ohechávo chupe, he'i: Nde niko Simón, Juan ra'y. Ko'águi rire nde rérata Cefas, he'iséva Pedro.
Ñandejára Jesucristo Ñe’ẽ.
5 DE ENERO
KUATIAÑE’Ẽ PETEĨHA SAN JUAN OHAIVA´EKUE 1 Jn 3, 11-20
Kóva hína pe ñe'ẽ pehenduva´ekue iñepyrũha guive: Tajajoayhu. Ha ani jaiko oiko haguéicha Caín, mba'epochy mba'eva´ekueha ojuka tyvýrape.
Ha mba'ére piko ojuka chupe? Hembiapokue ivaígui, tyvýra rembiapokue katu iporã.
Che pehẽnguekuéra, ani pehecha ramo umi yvypóra rekópe oikóva ndaija'éirõ pende rehe. Ñande jahasava´ekue ñemanógui jeikovépe, ha jaikuaa jahayhúgui ñande rapichápe. Pe oporohayhu'ỹva omano gueteri. Pe ohayhu'ỹva hapichapehína peteĩ porojukaha, ha peikuaa pe oporojukáva ndaikatuiha oguerekóvo ipype jeikove opa'ỹva. Jaikuaa mba'épa pe mborayhu Jesucristo ome'ẽ haguére hekove ñande rayhupápe, ha ñande avei ñame'ẽva´erã ñande rekove ñande rapicháre. Pe oguereko hetáva ha ndoiporiahurerekói hapicha oguereko'ỹvape, mba'éicha piko ikatúta he'i Tupã mborayhu oĩha ipype? Che ra'ykuéra pohayhu etéva, ani japorohayhu ñande jurúpente, jahechauka avei ñane mborayhu iñañeteha ñane rembiapokue rupi. Péicharõ jaikuaáta añete reheguaha ñande ha ikatúta ñande py'a guapy Tupã renondépe. Ñande py'apy ñane moĩ vaírõ Tupã renondépe, Tupã tuichave ñande py'apýgui, ha oikuaa opa mba'e.
Tupã Ñandejára ñe’ẽ.
SALMO 99, 1-5
TOGUEROHORY KO YVY ÑANDEJÁRAPE.
Toguerohory ko yvy Ñandejárape.
Pejapo vy'a pópe chupe hembipota,
peguahẽ hendápe sapukái rorýpe.
Peikuaa porãke: Ñandejárahína Tupã.
Ha'e ñande apohare ha ñande imba'e,
hetãgua ha ovecha iñu megua.
Peike hokẽnguéra rupi pemboaguijévo chupe,
ha hóga guýpe purahéi reheve.
Pemboaguije chupe ha héra perohory,
Ñandejára imba'e porãgui.
Imborayhu ndaijapýrai,
ha heko jeroviaha opa árape guarã.
EVANGELIO
ÑANDEJÁRA JESUCRISTO REKOVE HA HEMIMBO’E SAN JUAN OMOMBE’U HÁICHA
1, 43-51
Pe ára ambuépe, Jesús osẽ oho yvy Galilea gotyo. Ojuhu Felípepe ha he'i chupe: Eju che moirũ. Felipe niko táva Betsaidagua, oikohápe avei Andrés ha Pedro. Felipe oho Andrés rekávo ha he'i chupe: Oime rojuhu upe Moisés imandu'a hague hembiapoukapýpe ha maranduhára kuéra oñe'ẽ hague ikuatiakuérape. Upéva niko Jesús, ku José Nazaretgua ra'yhína.
Natanael katu he'i chupe: Nazarétgui piko araka'e osẽva iporãva.
Ha Felipe he'i chupe: Eju ndete ehecha.
Jesús ohechávo Natanaélpe oguahẽha ohóvo hendápe, he'i: Kóina ko oúva Israelgua añetetehína, avavépe ombotavy'ỹva.
Natanael he'i chupe: Mba'éicha rupi piko nde che kuaa?
Jesús he'i chupe: Rohecha kuri reguapy jave reína ígo máta guýpe, Felipe ne renói mboyve.
Felipe he'i chupe: Mbo'ehára, nde niko Tupã ra'y. Nde ha'e Israel ruvicha guasu.
Jesús he'i chupe: Péicha piko ere ha'e haguére ndéve rohecha hague reguapy ku ígo máta guýpe? Tuichave mba'e ko'ágã rehechávagui katu rehecháta ágã.
Upéi Jesús he'i chupekuéra: Añetehápe ha'e peẽme, peẽ pehechataha yvága ojepe'áramo ha Tupã remimboukuéra ojupi ha oguejýramo che, yvypóraicha ajuva´ekue yvy ári rendápe.
Ñandejára Jesucristo Ñe’ẽ.
6 DE ENERO
KUATIAÑE’Ẽ PETEĨHA SAN JUAN OHAIVA´EKUE 1 Jn 5, 5-13
Upe ogueroviáva Jesús Tupã Ra'yha, ipu'aka yvypóra rekóre.
Jesucristo jeju ko yvy ári ojechaukava´ekue y ha tuguýpe. Ndaha'éi ýpente, y ha tuguýpe uvei. Pe Espíritu voi oikuaauka kóva ha Espíritu hína añete. Oĩ mbohapy oikuaaukáva ko mba'e: Espíritu, y ha tuguy ha mbohapyve oĩ oñoñe'ẽme. Jarovia umi mba'e yvypóra he'íva, upe Tupã he'íva katu heroviapyve, ha'e oikuaaukágui Ta'ýra reheguáva. Pe ojeroviáva Tupã Ra'ýre, oguereko ipy'ápe voi ko ojekuaaukava´ekue. Pe oguerovia'ỹva Tupãme katu ombojapu chupe, ndogueroviáigui pe Tupã oikuaaukava´ekue
ita'ýra rehegua. Ko ojekuaaukávahína, Tupã ome'ẽ hague ñandéve jeikove opa'ỹva, ha avei ko jeikove oĩha Ita'ýrape. Pe oguerekóva Tupã Ra'ýpe, oguereko avei ko jeikove, ha ndoguerekóiva Tupã Ra'ýpe katu, ndoguerekói upe jeikove.
Ahai kóva peẽme peroviáva Tupã Ra'ýpe, peikuaa haguã peguerekoha jeikove opa'ỹva.
SALMO 147, 12-15. 19-20
JERUSALÉN, EROHORY ÑANDEJÁRAPE.
Jerusalén, erohory Ñandejárape,
Sión emomba'e guasu Tupãme.
Ha'e omboty hatã ne rokẽnguéra
ha ohovasa nde ra'y ha nde rajy kuéra nde pype.
Ha'e ogueru py'a guapy
nde yvýpe, ha nemoyvatã trígo iporãvévape.
Ha'e ombou iñe'ẽ ko yvýpe ha upe he'íva py'a oguahẽ.
Jacóbpe ha'e oikuaauka hembipota,
Israélpe ha'e ome'ẽ hembiapoukapy.
Ambue tetã ndive ha'e upéicha ndojapói,
ndoikuaaukái chupekuéra hembiapoukapy
EVANGELIO
ÑANDEJÁRA JESUCRISTO REKOVE HA HEMIMBO’E SAN MARCOS OMOMBE’U HÁICHA
1, 6b-11
Juan Bautista oñemoñe'ẽvo he'i: “Che rire oúta peteĩ ipokatuvéva che hegui, chéve ndaijáiva ajayvývo henondépe ajorávo chupe ipy rehegua sãnte jepe. Che pomongarai vaekue ýpe. Ha'e katu pene mongaraíta Espíritu Sántope.”
Umíva umi árape Jesús osẽ táva Nazaret, Galileágui. Ha Juan omongarai chupe ysyry Jordánpe. Osẽvo pe ýgui, Jesús ohecha yvága ojepe'a ha Espíritu Santo oguejýva hi'ári pykasúicha. Ha oñehendu peteĩ oñe'ẽva yvágagui, ha he'íva: “Ndehína che ra'y ahayhúva, che aiporavova´ekue”
Ñandejára Jesucristo Ñe’ẽ
Téra
ÑANDEJÁRA JESUCRISTO REKOVE HA HEMIMBO’E SAN LUCAS OMOMBE’U HÁICHA
3, 23-38
Jesús oguerekova´ekue 30 áño rupi omoñepyrũramo guare hembiapo. Oje'eva´ekue hese ha'e José ra'yha. Ko'ãvahína Jesús ypy kuerakue: José, Elí, Matat, Leví, Melquí, Janai, José, Matatías, Amós, Nahúm, Eslí, Nagai, Máhat, Matatías, Semí, Josec, Joiadá, Johanán, Resá, Sorobabel, Salatiel, Nerí, Melquí, Adí, Cosam, Elmadam, Er, Jesús, Eliézer, Jorim, Matat, Leví, Simeón, Judá, José, Jonam, Eliaquim, Meleá, Matatá, Natán, David, Jesé, Obed, Booz, Sélah, Nahasón, Aminadab, Admín, Arní, Hesrón, Fares, Judá Jacob, Isaac, Abraham, Térah, Nahor, Serug, Ragau, Péleg, Éber, Sélah, Cainán, Arfaxad, Sem, Noé, Lámec, Matusalén, Henoc, Jéred, Mahalaleel, Cainán, Enós, Set ha Adán. Adán Tupã ra'y vaekue.
Ñandejára Jesucristo Ñe’ẽ.
Téra
ÑANDEJÁRA JESUCRISTO REKOVE HA HEMIMBO’E SAN LUCAS OMOMBE’U HÁICHA
3, 23. 31-34. 36. 38
Jesús oguereko vaekue 30 áño rupi omoñepyrũramo guare hembiapo.
Oje'eva´ekue hese ha'e José ra'yha. Ko'ãvahína Jesús ypy kuerakue: José, Elí, Matat, Leví, Melquí, Janai, José, Matatías, Amós, Nahúm, Eslí, Nagai, Máhat, Matatías, Semí, Josec, Joiadá, Johanán, Resá, Sorobabel, Salatiel, Nerí, Melquí, Adí, Cosam, Elmadam, Er, Jesús, Eliézer, Jorim, Matat, Leví, Simeón, Judá, José, Jonam, Eliaquim, Meleá, Matatá, Natán, David, Jesé, Obed, Booz, Sélah, Nahasón, Aminadab, Admín, Arní, Hesrón, Fares, Judá Jacob, Isaac, Abraham, Térah, Nahor, Serug, Ragau, Péleg, Éber, Sélah, Cainán, Arfaxad, Sem, Noé, Lámec, Matusalén, Henoc, Jéred, Mahalaleel, Cainán, Enós, Set ha Adán. Adán Tupã ra'yva´ekue.
Ñandejára Jesucristo Ñe’ẽ.
7 DE ENERO
KUATIAÑE’ẼPETEĨHA SAN JUAN OHAIVA´EKUE 1 Jn 5, 14-21
Che ra´ykuéra:
Jajerovia Tupãre jaikuaágui, jajeruréramo pe ha'e oipotáva, ñane renduha. Ha jaikuaaháicha Tupã ohenduha ñane ñembo'e, jaikuaa avei jarekomaha pe jajerureva´ekue.
Oĩrõ oikuaáva hapicha ojapoha ivaíva ndogueraháiva chupe ñemanóme, oñembo'eva´erã ha Tupã ome'ẽta jeikove hapichápe ha'érõ angaipa ndogueraháiva ñemanóme. Oĩ angaipa ogueraháva ñemanóme ha upe tembiapo vaíre nda'éi oñeñembo'e haguã. Opa ñepu'ã Tupãre niko angaipa. Oĩ jepe angaipa ndogueraháiva ñemanóme.
Jaikuaa pe oguerekóva Tupãme Túvaramo, ndojapoveiha angaipa, Tupã Ra'y oñangarekógui hese, ha Aña ndopokói hese. Jaikuaa ñande Tupã mba'eha ha opa yvypóra reko rayhuhára oĩha Aña poguýpe. Jaikuaa avei Tupã Ra'y ou hague ha ome'ẽ hague ñandéve akã porã jaikuaa haguã pe Tupã añeteguávape. Ñaime ñemopeteĩme upe hi'añetéva ndive, he'ise Ita'ýra Jesucristo ndive. Kóva pe Tupã añeteguáva ha pe jeikove opa'ỹva. Che ra'ykuéra pohayhu etéva, peñeñagarekóke tupã gua'u kuéragui. Amén
Tupã Ñandejára ñe’ẽ.
SALMO 149, 1-6a. 9b
TOÑEMOMBA'E GUASU ÑANDEJÁRA.
Pepurahéi Ñandejárape purahéi pyahu,
umi hese ojeroviáva atýpe
chupe toñemomba'e guasu.
Israelgua toguerohory ijapo harépe,
Siongua toguerohory huvicha guasúpe.
Héra rehehápe pejeroky, tambor ha árpa púpe chupe pepurahéi.
Ñandejára niko ohayhu hetã guápe,
imboriahúvape oguenohẽ jejopy vaígui.
Tahory hesehápe umi imarangatúva,
oñenoháme jepe chupe topurahéi.
Ijurúgui tañahendu omomba'e guasúrõ Tupãme,
Umi hese ojeroviáva kóicha osẽ porãta.
EVANGELIO
ÑANDEJÁRA JESUCRISTO REKOVE HA HEMIMBO’E SAN JUAN OMOMBE’U HÁICHA
2, 1-11
Mbohapy ára rire oiko peteĩ ñemenda táva Canáme, opytáva yvy Galiléape. Jesús sy oĩhína ra'e upépe. Jesús ha hemimbo'e kuérape avei oñemoguahẽ ñe'ẽ oho haguã. Vino opávo, Jesús sy oñemboja hendápe ha he'i chupe:
Opa niko chugui kuéra ivino.
Jesús he'i chupe: Mba'ére piko ere chéve upéva? Ne'ĩra gueteri niko oguahẽ chéve che ára.
Isy he'i umi tembiguáikuérape: Pejapo opa mba'e ha'e he'íva peẽme.
Oĩ upépe 6 kambuchi y reheve, judíokuéra oiporúva oñemopotĩ haguã. Umi kambuchípe ija amo 50, 60 lítrokuéra rupi. Jesús he'i umi tembiguáipe: Pemyenyhẽ ýpe umi kambuchi.
Omyenyhẽ hikuái hembére, ha upéi Jesús he'i chupekuéra: Ko'ágã penohẽ michĩmi ha peraha upe tembiguáikuérape omyakãvape ho'u haguã
Péicha ojapo hikuái. Ha upe omyakãva tembiguáikuérape ho'u pe vino ýgui oiko vaekue, oikuaa'ỹre ha'e moõguipa osẽ. Umi tembiguái añónte umi oikuaáva, ha'ekuéra oguenohẽ haguére pe kambuchígui. Upéi pe omyakãva tembiguáikuérape ohenói pe omendávape, ha he'i chupe:
Maymáva niko ikaguy iporãvéva raẽ ome'ẽ oje'u haguã, ha oje'u heta rire ae katu, oguenohẽ pe iporãvéva. Nde katu niko reheja pe iporãvéva ko'ágã guarã.
Kóva ko mba'e Jesús ojapova´ekue Canáme, yvy Galiléape, mba'e hechapyrãva tenondetegua ha'e ojapova´ekue. Péicha ha'e ohechauka ipokatu ha hemimbo'ekuéra ojerovia hese.
Ñandejára Jesucristo Ñe’ẽ.
Fuente en Internet: http://jesuitas.org.py/
Enlace externo verificado y ON LINE a Abril 2013
