KANE’Õ ANGATA / KYVU KYVU / YVY SAPUKÁI / GUAYAKI SAPUKÁI / SÃSO POTAPY - Poesías en guaraní de FELICIANO ACOSTA

KANE’Õ ANGATA/ KYVU KYVU/ YVY SAPUKÁI/ GUAYAKI SAPUKÁI/ SÃSO POTAPY

Poesías en guaraní de FELICIANO ACOSTA

KANE’Õ ANGATA

Kuña

oguapy,

ombo’y,

ombyaruru

chokokue kane’õ.

Hy, hy, hy,

ojaojohéi.

Hy, hy, hy,

oipokyty,

ombojere

chokokue

jukyry

re’ẽro.

Y ombyaty

chokokue

juku’a.

Kuña

ohekýi iñangata

omoĩ hendive.

Oityvyro

ha omyasãi.

Kuarahy

oipyte,

omokã,

ogueraha,

kuña angata,

kuimba’e kane’õ.

KYVU KYVU

Kyvu kyvu

óga kupépe ojeheka

omymýi, otytýi.

Oguevívo oguata.

Hova oñomi,

yvykuápe oñotỹ.

Aníke che irũ

kyvu reha’ã.

Aníke oguevívo

reiko reguata.

Aníke kyvúicha

reñomi nde rova.

Ani rejo’o

nde yvykuarã.

Ani reñemi,

nde rova

toipeju yvytu

tenondéke eguata.

Aníke che irũ

kyvu kyvu,

reiko reha’ã.

YVY SUPUKÁI

Hasy katu ko yvy,

ikorasõme hasy,

ipytuhẽ kytã’i.

Huguy rape ityaipa

ha ipyahẽ ojupi

hye mbytégui okapu

ha avave nohendúi.

Ikangýma hekove!

Ha avave ndohechái,

avavete nohendúi.

Feliciano Acosta

GUAJAKI SAPUKÁI

Guahu asy

guajaki ahy’ógui

ka’aguýpe okapúva,

yvytu pepo kuápe hyapúva,

avave nohendúi.

Yvy,

ka’aguy,

ysyry oipota,

oheka.

Guajaki sapukái

avave nohendúi.

Ijapysópe ojevy

sapukái ryapu.

Guajaki oguata,

oguata ha oheka

yvy,

ka'aguy,

ysyry.

Avave,

avave ichupe nohendúi.

Guajaki,

tyke’y ypykue

ikane’õ,

ikangy.

Oguapy,

oma’ẽ yvate ha ohecha

karape yryvu oveve.

Peju...

Peju paraguái

ñamondýi yryvu.

Jaheka, jajuhu,

yvy,

ka’aguy,

ysyry

guajakípe guarã.

SÃSO POTOPY

Tuichaite mba'e niko

pe okágui jajúrõ

ha ñande resápe

jaru jaju kuévo

pykasu veve.

Jarúrõ avei

ñane ánga sãre

sãso pytuhẽ

ha ñande pirére

yvytu resãi.

Jaju jajuhu

ko tavaguasúpe

yvytu havẽ,

oñemi yvytu.

Sãso apytĩ mby

pykasu ohenói

ha ha’e oryrýi,

ipepo kangy.

Ñamboty’omi nga’u

okẽ ha ovetã

ñahavẽ’omívo

yvytu ñemi.

Tove pykasu

taipeporyapu

ha toguerojy

sãso potapy.

Fuente:

ÑE’ẼPOTY ATY – VOCES DE POETAS EN GUARANÍ

Por FELICIANO ACOSTA y NATALIA KRIVOSHEIN DE CANESE

Editorial Servilibro, Asunción-Paraguay 2005