JEPYTE / ÑE’Ẽ RA'ARÕVO - Poesías en MARIO RUBÉN ÁLVAREZ - Año 2005

JEPYTE / ÑE’Ẽ RA'ARÕVO

Poesías en MARIO RUBÉN ÁLVAREZ

JEPYTE

Oipyte ha oipyte

hapicha ry’ái,

hapicha pire,

hapicha ruguy.

Jasy oke mboyve,

kuarahy opa rire,

oipyte ha oipyte.

Hapicha resa

huguaitépe oñotỹ;

hyére okakuaa ipuru’ã

ha oipyte ha oipyte.

Kane’õ réra ichugui hesarái,

oñani, iñakuã,

ohupyty katuete hapicha.

Ijuru ipukupáma,

hova ojekáta katuete,

okambu ha’eichaguáre,

ára reíre ho’óre okaru.

Oipyte ha oipyte,

omboypáma ko tetã.

ÑE’Ẽ RA’ARÕVO

Toúna ñe’ẽ

ñane retã apére toguata,

óga kapi’ípe toguahẽ,

táva guasu tohuguatĩ,

toy’u ysyry satĩ me,

topytu’u yvyra guýpe,

opórupi taisarambi.

Toikuaa ñembyasy rova,

tomyendy vy’a rata,

tomombarete mborayhu,

toikytĩ kyhyje sã,

tomoirũ py’aguasu,

mitã resa tomokã.

Kyse ha mboka tomuña,

tomyakã purahéi,

ñaña, ruguái toisu’u.

Toúna ñe’ẽ,

ára pyahu togueru.

Tomondoho tesay,

tombogue py’arasy,

tombopuka panambi,

tomoheñói ko’ẽ pepo.

Toúna ñe’ẽ

ha kirirĩ pukuete pytũ

toso, topa, tomanoite.

• ÑE’ẼPOTY ATY – VOCES DE POETAS EN GUARANÍ - Por FELICIANO ACOSTA y NATALIA KRIVOSHEIN DE CANESE - Editorial Servilibro, - Asunción-Paraguay 2005

• IDIOMA GUARANÍ - POESÍAS - MÚSICAS - ESTUDIOS - ENSAYOS - DICCIONARIOS