KARAI VOSA
Oipykúi tapepa'ỹ ipuku javeve ára
¡Heruĝuáguipa ou! ¡Karai vosa vava!
Oguata anga umi pokoka akã ky'áre
Oikũmby yvytimbo itupãmba'e reka.
.
¡Mboriahu reko apĩ! Pe yvágante ku hóga
Ndaitúai... Ndaisýi... Oikove tyre'ỹete
Ha'éko oiko oipyaha... Ohohápe ohopáma
Mba'eve ndoguerekói... ¡Ha'angámante imba'e!
.
Ñembyahýi ha ty'airy hetepy ohasapáva
Imba'e rekotevẽ ijape omombe'u
Omo'ãva ipire ao sorópe
Ha charápe oñuvã ojehe hembireru.
.
Ivosa ku aramboha ha hupa opytahápe
Ipype ku oñoña aokue ape ky'a
Ha pype ku haguino hi'upy ha opa týra
Petỹ hũmante hemby akãópe ohova'erã.
.
Hymbami rova po'i, jagua'i ojuapykuéri
Ku iñirũ kangue vera oheréi ipypore
Ha hendive hopehýirõ, ha hendive okaru'ỹrõ
Ojuehe hakate'ỹ... Oje'ói ojueheve...
.
Ichugui oje'ére mboriahuvére ko'ýgui
Jerovámante ome'ẽ mavaite huĝuaitĩha
Mitãnguéra hechaha okañy py'amirĩgui
Osusũ okyhyjégui... Oimo'ã rerahaha...
.
Ipy'a rekotevẽ ohasávape he'íva
Akãópe ojerure asyete tupãmba'e
Nahembýi ichugui okẽ, oĝuahẽ ĝuahẽ reíva...
Po ryrýi ombohasa... Ha oity iñembo'e...
.
Tekove rova cha'ĩ oikovéva jehekápe...
Hesarái ichugui po'a... Jeguarúmante ome'ẽ
Ndijavýi ytyapy ijehe omboguatáva
Hovayke iperepa teko asy rapykuere.
.
Upevére ndoikovéi... ¡Teete ñandeichaguánte!
Ijapéguionte ipague... Ha hi'ánga ñandete...
Iñe'ã naiñambuéi... ichupe ho'a vaíre...
Anichéne ñaroyrõ ñane ánga pehẽngue...
.
Ñandejára mborayhu ha isy réra guasúre
Ojoyvy iñembo'e ohenóivo pojera
Ñendyvu jepe to'u... Hetavéne hetũhára
¡Upe po marangatu Tovasámante oikuaa!
.

KARAI VOSA. Un popular personaje del folclore paraguayo. Un anciano cuya pobreza lo impulsa a mendigar. El poeta argumenta que en dignidad no es inferior a nadie y que es la expresión de la honradez y la fidelidad al evangelio cristiano.

 

 

 

 

 

 

.
Fuente: POESÍAS DEL PARAGUAY – ANTOLOGÍA DESDE SUS ORÍGENES. Realización y producción gráfica: ARAMÍ GRUPO EMPRESARIAL, Dirección de la obra: OSCAR DEL CARMEN QUEVEDO. Recopiladores y autores: RAÚL AMARAL, MARÍA BARRETO DE RAMÍREZ, AÍDA ORTÍZ DE CORONEL, ELA RAMONA SALAZAR S., RUDI TORGA/ Tel. (595-21) 373.594/  arami@rieder.net.py  – Asunción/ Paraguay. 2005. 781 pp.).