ANI NDEPOCHY ARE - Ohai: DAVID GALEANO OLIVERA

ANI NDEPOCHY ARE

Ohai: DAVID GALEANO OLIVERA

 

Leer original (hacer clic) en (http://cafehistoria.ning.com/profiles/blogs/ani-ndepochy-are) (enlace caduco)

Leer también en (http://lenguaguarani.blogspot.com/2015/01/ani-ndepochy-are.html)

Asimismo leer en (https://dgaleanolivera.wordpress.com/ani-ndepochy-are/)

 

I

 

Yvypóra ñande rekópe

 

Jaikova'erâ mborayhúpe

 

Vy'a ha jekupytýpe

 

Oñondivemi jaguata.

 

Naiporâi ñandepochy

 

Naiporâi ñaneñaña

 

Ha oiméramo ndepochy

 

Ani ndepochy are

 

Upévango ivai

 

Ndoguerúi mba'e porâ

 

Pya'e nemoingo vai

 

Nembohasy katuete

 

Ha omomarâ nde reko.

 

Eñeha'âke uvei

 

Emombarete ndepype

 

Tekokatu ha tory

 

Ha emoheñói kunu'û,

 

Pukavymi eipuruhápe

 

Nde jerére emyasâi

 

-Opavavépe ehypýi-

 

Teko marangatumi,

 

Jahechápa upeichahápe

 

Ñamyenyhê ko yvóra

 

Mborayhu poty jajáigui.

 

Upéva ñanemba'e

 

Upéva Tupâ mba'e

 

Yvypóra moingoveha

 

Vy'apavê me'êha.

 

Upévare che ha'e

 

Yvypóra ñande rekópe

 

Jaikova'erâ mborayhúpe

 

Vy'a ha jekupytýpe

 

Oñondivemi jaguata.

 

II

 

Emyanyhê nde reko

 

Opaite mba'e porâgui

 

Ha tapykuépe eheja

 

Py'arô ha jejahéi.

 

Nde sy, nde rúpe

 

Akóinte etupânói

 

Ha eñakâity chupekuéra.

 

Umíva ndive naiporâi

 

Eiko ndepochy are.

 

Aníke vyroreíre

 

Ejahéi, ne'ambu'a térâ

 

Nderovapuku chupekuéra

 

Upéva ndo'aporâi

 

Ñande Ru Marangatúpe

 

Hepy rehepyme'êta

 

-Nde arapaha oĝuahêvo-

 

Hendápe reñembojávo.

 

Upéicha avei ehayhu

 

Ne memby, nde ra'y, nde rajy,

 

Ne mborayhu jára

 

Ha mayma nde joyke'ykuéra

 

Umíva niko ha'e

 

Ndejaveguánte avei

 

Ha sapy'ánte ikatúva

 

Ombopupu nde ruguy

 

Ha nembopochy kakuaa.

 

Oiméramo péicha ojehu

 

Ha oipota'ŷre ojapo,

 

Ehejarei chupekuéra

 

Upe hembiapo vai.

 

Ehendúke upe jave

 

Upe ne korasômíme

 

Kunu'û pópe, ndéve, he'íva

 

“Ani ndepochy are”.

 

Umívango ne pehê

 

Umívango nderayhu

 

Umívango nemba'e

 

Umívango ne ánga irû.

 

Ehendumíntena che ñe'ê

 

Ha emyanyhê nde reko

 

Opaite mba'e porâgui

 

Ha tapykuépe eheja

 

Py'arô ha jejahéi.

 

III

 

Oiméramo ndepochy

 

Ani ndepochy are

 

Hekoviáke ñañoty

 

Tekokatu ra'ŷimi

 

Tahokypu kunu'û

 

Taipotyjera mborayhu

 

Tahi'aju vy'apavê

 

Ha tajaiko joajupápe.

 

Ndaipóringo iporâvéva

 

Mborayhu pópe jeikógui,

 

Tuicha ñanembovy'a

 

Jahechávo ñane pehê

 

Oku'érô ko yvy ári

 

Py'aguapy ha vy'ápe

 

Tesâi ha tekojoajúpe.

 

Mba'e guasuete avei

 

Ko arapy tuichakue

 

-Ndorekói mbojojaha-

 

Mitâmimi jahechárô

 

Pukavy ha vy'apópe

 

Oñañuâ ha hetû

 

Itúva térâ isýpe.

 

Ajépango iporâite

 

Upe mba'e guasuete

 

Ohechaukáva ñandéve

 

Mba'éicha jaikova'erâ

 

Joaju, mborayhu pópe

 

Ha Ñande Ru oipotaháicha.

 

Aipotánte cherendu

 

Ha oiméramo ndepochy

 

Ani ndepochy are,

 

Hekoviáke ñañoty

 

Tekokatu ra'ŷimi

 

Tahokypu kunu'û

 

Taipotyjera mborayhu

 

Tahi'aju vy'apavê

 

Ha tajaiko joajupápe.

---

• GALERÍA DE LETRAS, MÚSICA Y CIENCIAS - Escritores, Poetas y Músicos