Poesías de CRISPINIANO MARTÍNEZ GONZÁLEZ

 

IMOMORÃMBY
Ku mbyja ka'arupy osẽva ha'eñomi
Upéichaite remimbi neporãgui che reindy
Ahecháva pytũmby torypaitépe resẽ
Yvotýpe rejegua ndijavýi ku tupãsy.
.
Nde nova pytãngymi nde pire katu kamby
Ha nde áva hũ asy, oñeñopẽ jovaimi
Nde pyti'áre avei hi'aju atã asy
Angaiparã che reindy ku mokõi yvamimi.
.
Ha'ete ku túna aju, pe ne rembe pytãite.
Hesénte amano mboyve hi'ãva chéve akambu
Nde reko imarangatu, pykasúpe ha'ete
Kunu'ũ raity meme, ne ñe'ẽ música pu.
.
Repukavývo hory nde resa hũ veraite
Ha ojeka umi ne rembe ñaimo'ã rosa poty
Ha umi jasy kypy'y nde tyvyta mokõive
Ikarapã porãite, ¡Ko mba'e imomorãmby!
.
Ho'a vove pytũmby pe che rokárape asẽ
Ha ama'ẽvo nderehe añandu cheangapyhy
Hi'ãntepa tupãsy nichomíme romoinge
Ha upépe ndéve añoite che mborayhu taipoty.
.
Maymárõ porãku'i nderehénte ijatypa
Ha yvypóra angaiparã Ñandejára nemoĩ
Che po'anga'u heñói, pe Tupãme ajerure
¡Chemba'erãnteko che, roipota kuñataĩ!

 

 

ESCUCHE EN VIVO/ LISTEN ONLINE:

IMOMORÃMBY

 Intérprete:   LUZ AURORA

Material:  CANTO Y SENTIMIENTO de Volumen 2

 

 

IMOMORÁMBY. Como la estrella, titila solitaria en mi tierra tu hermosura. Desearía tenerte en mi rancho, como se conserva en el santuario a la Madre de Dios. Si tuviera suerte, me dejaría guiar por tu amor, con mi imperecedera admiración.

 

 

.
CHE REMBIREKÓPE
Kuña marangatu ipuraheipýva
Heko jojaha'ỹva ku ysapýicha hendypu
Ijurúpe pukavýmante ipotýva
Ha iñe'ẽme ipiru'ỹva mborayhu.
.
Hesa hũ veraite, iñe'ẽ ijasukáva
Kunu'ũ meme voíva ko Tupã rembiapokue
Hi'ánga morotĩ ára resáicha hesakãva
Yvágagui yvoty, aipo'ova'ekue.
.
Ha'énte angapyhy chéve ome'ẽva
Ha opa ára ikunu'ũme cheañuã
Chemoirũva vy'a'ỹ ha vy'apavẽ.
.
Kuña momorãmby cherayhu añetéva
Ichupe ğuarãnte che aikoveva'erã
¡Che symi rekoviare opytava'ekue!
CHE REMBIREKÓPE. Un bello soneto que afirma la felicidad conyugal que día a día se construye con la mutua comprensión, cuando hombre y mujer, profundizan el amor.

 

 

.
Fuente: POESÍAS DEL PARAGUAY – ANTOLOGÍA DESDE SUS ORÍGENES. Realización y producción gráfica: ARAMÍ GRUPO EMPRESARIAL, Dirección de la obra: OSCAR DEL CARMEN QUEVEDO. Recopiladores y autores: RAÚL AMARAL, MARÍA BARRETO DE RAMÍREZ, AÍDA ORTÍZ DE CORONEL, ELA RAMONA SALAZAR S., RUDI TORGA/ Tel. (595-21) 373.594/ arami@rieder.net.py– Asunción/ Paraguay. 2005. 781 pp.).

MÚSICA PARAGUAYA - Poesías, Polcas y Guaranias - ESCUCHAR EN VIVO - MP3

MUSIC PARAGUAYAN - Poems, Polkas and Guaranias - LISTEN ONLINE- MP3