.
ÑA MA’ẼRA
.
Péina ña ma’ẽra ohasa jeỹma
heko tujaitépe mbeguekatumi
ha’éko ikangýma pytu’u tu’úpe
oho oheka hi’upyrami.

. Pohã mbovymíko oraha ajakápe
. ysyry mboypýri ombyatýva’ekue
. ka’aru jave heta ñeha’ãme
. osẽva torýpe ku oikuave’ẽ.

Oĩma he’íva imba’e porãgui
pe pohã oguerúva ipokatuha
hasýva ho’úrõ upe ka’aýpe
ndojavýivoi katuete okuera.

. Péicha anga oikóva ymaite guivéma
. ao hũ potĩme oñakãpytĩ
. ku pynandimi márõ noñandúiva
. pe ára haku ha ro’y vai.

Sapy’areínte virumi ombyatýrõ
oĩpapa ikuãre ha ojokua hatã
omoĩ haguã ijao ryépe
jehovasa hápe iko’ẽrorã.

. Mamo oikokuévo pe tape ku’áre
. pejuhúva’erãnte ha’eño oñe’ẽ
. térã yvyra guýpe mymba apytépe
. oguapy ipýre opuka he’ẽ.

Ypy’a porãgui akói hapykuéri
avyu ha vy’ápe mitã iñapesã
hi’upy ha yva ijajakamíne
katuete orekóva ome’ẽva’erã.

. Há éko ndahérai ha ndojekuaáiva
. mamóguipa ou ni hekovekue,
. ojehayhuhámante ikatu ha’éva
. imarangatúre upe hekove.