NE MITÃKUÑA/  ÑEMBISO/ PÉINA

Poesías en guaraní de SUSY DELGADO

NE MITÃKUÑA

Ne mitãkuña....

Anive nderesaho

pe cállere ñaimo’ã

nde róga rehejaséva.

Ndovaléi nde rehecha

cállepe oiehúva,

ndahasýiva kuña ogueraha.

Anive reporandu

reporandu’ỹ va’erã,

umíako hína mba’e

ndovaléiva kuña oikuaa.

Anive repukaite

kuimba’e kuéra renondépe,

péako aña nemokyrỹiva,

Aña ndehundiharã.

Ha hi’árietegua,

ani cheñe’ẽ joko, neñe’ẽ reitýti chéve,

reñemoñe’ẽkuaa nde kakuaaguãme,

moõiko nde reikuaáta

mba’eve, nde kuña.

Kuñáko itavy,

kuñáko ikangy,

naiñakãporãi.

Kuña itarova,

iñe’ẽ rei

ha haku rei.

Kuña ndaha’éi

kuimba’éicha

mundopýre oiko va’erã.

Ne mitãkuña, ejapysaka,

ndéko nde rogapymíme,

ñeñongatupy ha kirirĩ háme,

tindymínte reiko va’erã.

ÑEMBISO

Ñembiso, ñembiso,

Ñembiso kurusu,

chipapo asaje,

chipapo mboriahu,

mboriahu ñembyahýi

rembiapo.

Ojupi ha oguejy

ha hy’ái ha osyry,

oguevi ha oikutu,

osapukái!...

Opuka ha huguy

ñembiso asaje,

mboriahu...

ñembiso...

ñembiso...

PÉINA

-Péina ja ohóma

ko che memby...

Che resay

ohovasa.

Ohóje aipo Guenosáirepe

omba’apomi haguã.

Mba’épeiko omba’apóta

mitãkuña pituva.

-Péa ko Maria

ja ohoitéma,

oñehundívo,

ja ndouvéima.

Guenosáirepe ohóva,

ohóva oñekambiapa,

ndoikuaavéi Paraguái,

iñe’ẽ de otropa.

Ha sapy’a ou jeýrõ

ou ñandedehpresia.

Anichéne,

ndovaléi

péicha ere.

Ou jeýne

ñane memby

hekopeguáicha.

Hetaitéma Guenosáire

ore memby reraha,

reñohẽ ore resay

ha reipyte ore ry’ái.

Ja iporãntema péicha

neryguatã orehegui,

embou jeýna oréve

umi ore membymi.

Fuente:

ÑE’ẼPOTY ATY – VOCES DE POETAS EN GUARANÍ

Por FELICIANO ACOSTA y NATALIA KRIVOSHEIN DE CANESE

Editorial Servilibro,

 Asunción-Paraguay 2005

ENLACE INTERNO A ESPACIO DE VISITA RECOMENDADA

EL IDIOMA GUARANÍ, BIBLIOTECA VIRTUAL en PORTALGUARANI.COM

(Hacer click sobre la imagen)