Paje jára memby

Guasu Kora- Villeta, Setiembre de 1986

 Tojoráke pya'e imohãy. Ejoráke.

Ejoráke ha ýpe emombo.

Paje jára guaĩ ipire tojekáke.

Ejora jahecha nde paje.

Ma'ẽmi pe hesa morotĩ ha ojere.

Omanóma jeko karia'y pyahuete

ha pajégui omano, mbykyetéko hasy

ipire joveréje opyta, okaipa ijahy’o

iñe’ẽ ñosẽvéi, ihu'únte vaicha

katu ikéra ha ipáype paje jára ohecha.

 

Tanimbúpe ojahu mitãmi ajuvo'ĩ

tataypy resaképe mandi'o ohesy

ha ojeiko pe ijerére, kundahápe ojeiko

ojeju ha ojeho ha ha’e ndohupíri hesa.

Haimetéma hu'ũ; ojopy ha ojopy imandi'o.

 

Yvytu piro'y yvytýgui oguahẽ

mombyry ñahendu ytykúi piriri

hyakuã omyasái yvoty ju mirĩ.

Mba'eve ryapu omondýi, omondo pe ñe'ẽ

yvypóra ayvu ojuka, omokõ kirĩrĩ.

 

Pejopy tojora ipaje. Tojoráke.

Hekoaguégui ojapo. Iju'úgui ojapo.

Tapekõi kurusúpeje oime.

Karia'y omombe'u jepevéma omano

hetepy ndohejáigui oñe'ẽ.

 

Ijuru ko hyjúi ha hendy, otini pe hesa

ha hy'áivo ijapégui tuguy'y osyry

ipytu ko ha'o, haguino paje jára pochy.

Ipyahẽ ko gua'u jepeve mba'eve noñandúi

hogapy oheja iñe'ẽ ipypégui aña ojaitypo.

 

Hendypo sapy á tata'y apytekua

tanimbu rapatĩ iñakã ombojegua

isymi jyva ári oñeno ramogua

ohechávo iképe mitãmi ryepo

py'andýipe ojecha ha vokóike opu'ã.

 

Kerai, ñemondýi mitãmíre opoko

ha oñañívo mo'ã opyta, ojere, omaña,

ipomi ropyta mokõivépe ojoja oikytývo

hesa opayve, imandu'a: piko iképe ra’e

isymi jyva ári oñenórõ ohecha.

 

Tesakã; tyapu pore'ỹme añete

ndijavýi ku heñóiva ko arapy renyhẽ

kirĩrĩ ha pytũ. Katu upéi sapy'a

mombyry ipyahẽ, ipyahẽ juku’a,

takuapu ryapu ha pyahẽ ojehe'a.

 

Oguapy kuruchĩ ko'ẽtĩ oha’arõ

tataypýpe jevy ha okevyvo

isy'y oguãhérõ hendápe ohecha

ha py'a ryryipópe -tanipo okyhyje-

hovayva osy'ýre ha ichupe oporandu...

 

"Che sy'y chepotápa, ne membýrõ

aikose, ajopóima piky, ajapo monde'i

katueténe ne me che rayhu.

Rehendúpa. Ahase nendive.

Ahase nendive mombyry".

 

"Ha nde sy", isy'y oporandu.

Jepevévõ vaicha pe mitã ndoikuaái

mba'eve, iñe'ẽ ipyáu, osyry hesay

ha he'i: "Omanóma,

omanóma ha'i, omano".

Opytu’u.

ENLACE A

ÑE’Ẽ - POEMARIO EN GUARANI PAĨ, GUARANÍ PARAGUAYO Y CASTELLANO

por GREGORIO GÓMEZ CENTURIÓN

EN PORTALGUARANI.COM

(Hacer click sobre la imagen)

MÚSICA PARAGUAYA - Poesías, Polcas y Guaranias - ESCUCHAR EN VIVO - MP3

MUSIC PARAGUAYAN - Poems, Polkas and Guaranias - LISTEN ONLINE - MP3