Ñe’ẽ
Ñe’ẽ
Guasu Kora, Villeta.
Abril de 1975.
Tyapu reínteramo pe ñe’ẽ
ñandéve nde'íri mba'eve ahẽ
ñahendu añete mba’e parãrã
ha katu pya'e ñanemonguerái
nañamokõvéima, nañahenduséi
guelele atýra, pelele jovái.
Ñe'ẽ ndaha'éi tyapu rei
ñe'ẽ ko hete, ijuru, hesa
ñe'ẽ ikorasõ, hi'ágã, ipyapy
upéicha rupi ñe'ẽ jahecha
ñe'ẽre añete japokokuaa
ñe'ẽ ndaha'éi parãrã rei.
Hetave jevy tyapu'ỹ etére
ñe'ẽ, añete, oñeñanduka
tembiapokue ári jehesaperãnte
tyapu rekópe ojeporuka
tembiapo pytúgui ñe'ẽ, añete
ndoikuaái ha’e tyapu guelele.
Ha katu heta guelele jarýi
ndohayhúi rasáva ñe'ẽ, añete;
tove katu umíva taikũjere
tokuirikuikui, toperepepe,
ijahy'okuágui tombopororo
hyakuã raguinóva ñe'ẽ re'õngue.
¿Ñe'ẽ re'õngue? ñe’ẽ nomanói,
tyapu ikatu, jepeve ha'e
he'õnguevoi oimehágui opu.
Ha katu ñe'ẽ, ha'égui añete
noñemomirĩri mba'eveichavérõ
ha nomanovéima araka’eve.
Guelele rayhuhára apytépe
tou ouhágui ho'áva ñe'ẽ
te'íko he'íva, ta'iporãiteve
maymáva ohendúne guelele meme
ha upéicha rupi guelele jey
ijuruguikuéra ñahendúne osẽ.
Ty’ái, kane’õ, apajereihápe
tyapu járakuéra ma'ẽ ro poguýpe
ñe'ẽ añete oñembohete
ha upeha guive mborayhu memégui
ijehe añónte naimandu'avéima
hapicha rayhúma omotenonde.
Yvu resatĩ tapia osyrýva
mborayhu ykua Tupã rekove
ha upégui hoy'u ñe’ẽ, añete
ha upéicha rupi mborayhu meme.
Tembiapo ndaipóri, ndaipóri ñe'ẽ
ndopupúirõ ikuápe Tupã rekove.
Ñe'ẽ tembiapo, tembiapo ñe’ẽ
ha ndaupeichaikuévo tyapu guelele.
Tembiapo pyahu. Tekove pyahu.
Arapy pyahu tembiapo añete.
Tembiapo guasu tekojojarã,
pévako ha'e, añete, ñe'ẽ.
ENLACE A
ÑE’Ẽ - POEMARIO EN GUARANI PAĨ, GUARANÍ PARAGUAYO Y CASTELLANO
por GREGORIO GÓMEZ CENTURIÓN
EN PORTALGUARANI.COM
(Hacer click sobre la imagen)
MÚSICA PARAGUAYA - Poesías, Polcas y Guaranias - ESCUCHAR EN VIVO - MP3
MUSIC PARAGUAYAN - Poems, Polkas and Guaranias - LISTEN ONLINE - MP3
